Vaknaði um daginn eftir miklar og erfiðar draumfarir sem sögðu mér að hætta að vera svona eftirlátsamur og setja fótinn niður þegar einhver er að vaða yfir mig á skítugum skónum. Mótmæla í stað þess að leyfa drullunni að ganga yfir mig mótþróalaust.

Þarna hefur faðir minn heitinn sennilega verið að senda mér skilaboð gegnum móðuna miklu. Maður sem leyfði engum að valta yfir sig án þess að fá að minnsta kosti kjaftshögg að launum fyrir viðvikið. Margtuggði ofan í mig að hlýða aldrei skipunum því ég væri ekki fæddur þræll, og að leyfa engum að vaða yfir mig með frekju og yfirgangi.

Ég hef fylgt þessum ráðum misvel í gegnum lífið og forðast að þurfa beita ofbeldi til að verja minn hlut. Frekar lúffað og leyft frekjum vaða yfir mig í von um að vera látinn í friði þaðan af.

En ekki lengur eftir þennan draum. Verð bráðum fimmtugur. Tími til kominn að sýna einhvern kjark og slá til baka þegar frekjur reyna að vaða yfir mig á skítugum skónum. Kannski ekki á sama máta og faðir minn sem kýldi gaura umsvifalaust í gólfið ef þeir voru með kjaft. Reyni að ræða aðeins við þá áður en vinstri krókurinn kemur og neglir þá niður. Gef þeim smá séns.

Einhver Beggi sálfræðinemi hefur ákveðið að gerast hinn íslenski Jordan Peterson / Andrew Tate og netheimar hafa réttilega farið á hliðina og fordæmt hann til Helvítis.

Við nennum ekki svona gaurum. Af hverju panta þeir sér ekki hótelherbergi saman og sleikja punginn á hvorum öðrum í stað þess að bögga okkur hin með leiðindum sínum?

Tók leið 4 inn í Hamraborg án vandræða á laugardaginn var. Ætlaði svo með leið 1 niður að Háskóla Íslands en hætti snögglega við þegar ég sá smekkfullan vagninn úr Hafnarfirði og Garðabæ renna í hlað með þjappara við dyrnar sem ýtti farþegum inn í vagninn. Beið frekar í 10 mínútur eftir tvistinum og skipti um vagn á Hlemmi.

Þjónusta strætisvagnanna versnar með hverjum degi því að væntanleg Borgarlína á að leysa öll núverandi vandamál. Borgarlína sem mun aldrei koma því hún er komin í hendur Sjálfstæðisflokksins sem er á móti almenningssamgöngum…nema einhver úr þeirra röðum græði á dæminu.