Sóttvarnaaðgerðir stjórnvalda fyrir komu bóluefna voru einhvern veginn á þá leið að nú fer pabbi í meðferð svo ástandið á heimilinu batni. Svo kemur pabbi aftur heim og heldur áfram að drekka þar til hann fer í meðferð aftur. Svo kemur pabbi aftur heim og heldur áfram að drekka.

Í stað þess að henda fylliraftinum út af fullbólusettu heimili á að senda hann enn einu sinni í meðferð svo hann geti komið aftur heim og haldið áfram að drekka. Leyfið honum bara að drekka sig í hel í einrúmi í stað þess að senda hann alltaf aftur heim til að skemma heimilislífið.

Samstaðan er rofin og mörg okkar nennum þessu ekkert lengur. Sýnið veirunni fullbólusettan fingurinn og hættið að eltast við sóttkvíar og tölfræði. Kominn tími til að lifa með covid-19 án takmarkanna. Treysta fólki til að sjá um eigin sóttvarnir innan um aðra.

# Heimur versnandi fer. Á miðöldum dugði Biblían til að halda skrílnum í skefjum. Nú þarf heila veiru til.

# Vinnur Þórólfur skákina gegn ríkisstjórninni og fær aftur að ráða öllu hér á landi?

# Hvaða nýja Helvíti bíður okkar í næstu viku. Verður sett á útgöngubann um nætur ásamt öðrum leiðindum?

# Þjóðhátíð, gaypride, menningarnótt og marathon. Allt farið annað árið í röð. Verða nokkuð Jól. Eigum við ekki bara að sleppa þeim líka!

# Fjórða bylgjan er hafin. Og þrátt fyrir allar bólusetningar. Við erum komin með nóg! Bylgjan FM 98.9 er ekki einu sinni skemmtileg lengur.

# Hvað er allt þetta lið að gera fyrir utan Orkuhúsið í röð eftir pinna upp í nös og niður í kok. Varla var það allt boðað þangað eða er með einhver einkenni. Þvílíkir andskotans sauðir að búa til skotfæri fyrir þau sem vilja halda leiðindunum áfram þrátt fyrir bólusetningar.

# Fram til þessa hafa fáir af bólusettum veikst alvarlega og lagst inn á spítala. Vonandi helst það áfram og að við klárum að bólusetja restina af þjóðinni til fulls. Annars verða öll næstu sumur svona! Opnað fyrir allt í júlí og svo skellt aftur í lás í ágúst.

# Þegar sóttvarnalæknir segir að við vitum hvað virkar, þá er hann að tala með rassgatinu eins og stundum áður. Þessar sífelldu takmarkanir til og frá hafa ekkert gengið til lengdar og eru að gera þjóðina geðveika. Andleg vanheilsa getur líka orðið að faraldri. Óhætt að taka það með í jöfnuna.

# Á eftir Delta koma svo eflaust Epsilon og Zeta afbrigðin. Eigum við hrökkva í kút í hvert skipti og skella í lás. Er ekki kominn tími til að líta á veiruna sem árstíðabundna flensu fyrir bólusetta sem eru ekki aldraðir eða með undirliggjandi sjúkdóma? Dæla þriðju sprautunni í landann og hætta að vera svona hrædd.

# Við stundum vitaskuld áfram persónulegar sóttvarnir af kappi með tíðum handþvotti, spritti og grímum. Kássumst ekki upp á ókunnuga. Höldum niðri hóstanum í lyftum og öðrum þröngum rýmum.

Þrjóskaðist lengi við en lét mig hafa það eftir nokkra kalda og keypti aðgang að streymi kvöldvöku og brekkusöngs í Eyjum hjá Senu. Auðvitað var hökt til að byrja með en svo skánaði allt og dagskráin leið áfram án truflana. Kenni gamalli tölvu um frekar en Senu.

Magnús Kjartan brekkusöngvari stóð sig með prýði. Skilaði sínu af stakri snilld og var laus við allan hroka og kvenfyrirlitningu forvera síns. Framtíð í þessum gaur.

Kvöldvakan var líka frábær með úrvali af söngkonum eins og Jóhönnu Guðrúnu, Klöru, Röggu Gísla og Guðrúnu Árnýju. Pálmi Gunnarsson og Sverrir Bergmann voru þarna líka. Albatross lék undir.