Við íslendingar erum spennufíklar upp til hópa. Iður jarðar opnast og halarófan heldur í átt að gosinu í stað þess að hlýða Víði og halda sig heima. Allir verða að fá sjálfu fyrir instagram, facebook og tinder. Drónahjarðir, þyrlur og flugvélar sveima svo yfir lýðnum. Einhver gæti skaðast í svona sirkus en okkur er slétt sama.

Ef einhvers staðar er eldur, þá flykkist Íslendingurinn þangað eins og naut að nývirki. Húsbrunar laða fólk að sér sem fer akandi á milli bæjarhluta til að berja eldinn augum og þvælast fyrir viðbragðsaðilum. Í æsku lærðum við snemma að elta sjúkrabíla, hjóla upp í Fossvog til að sjá þyrluna lenda við spítalann eða hlaupa út í móa til að hjálpa við að „slökkva“ sinubrunan.

„Sjáðu ljósið“ segjum við meðan dinglum ljósi fyrir framan ungabörn. Strax þá hefst þessi leikur að eldinum. Innrætingin um að hlaupa í átt að ljósinu í stað þess að halda sig í myrku örygginu.

Og nú ætlum við að galopna landamærin fyrir erlendum skríl með fölsuð vottorð keypt á netinu fyrir 25 dali. Bara til að fá smá innspýtingu í túrismann. Rútufyrirtækið hans Bjarna Ben. og Bláa lónið. Fjórða bylgjan kemur svo í kjölfarið með takmörkunum og lokunum. Væri ekki nær að bíða aðeins lengur og klára að bólusetja þjóðina að hjarðónæmi!

Umheimurinn verður lokaður í allt sumar. Af hverju í ósköpunum erum við að opna fyrir einhverjum fáeinum hræðum sem segjast vera bólusettir eða með ónæmi? Allt fyrir nokkrar krónur í kassann. Af hverju megum við Íslendingar ekki njóta þess að ferðast nokkuð örugglega um fallega landið okkar án hættu á fjórðu bylgjunni? Djöfull eiga stjórnarflokkarnir eftir að tapa í kosningunum í haust ef faraldurinn fer aftur á flug.

Lengi vel var konum og stúlkum haldið niðri af körlum og drengjum. Öldum saman og óréttilega. Langt fram eftir tuttugustu öldinni. Allt fram á sjöunda áratug, er þær brutu af sér hlekkina, og svo kom #MeToo byltingin og leysti hnút af málstöðvum fjölda kvenna sem í kjölfarið lýstu frá misnotkun af hendi karla gegn sér. Mjög gott mál. Byltingin var hafin. Björt framtíð framundan.

En byltingin á það til að éta börnin sín. Núna má nákvæmlega ekki neitt ef þú ert maður eða drengur. Tvíræðir brandarar eru bannaðir. Ekki má karlmaður lengur reyna við konu á netinu eða á öldurhúsum. Það er kynferðisleg áreitni. Karlmaður má alls ekki lengur líta á konu. Það er einnig áreitni. Drengir mega ekki lengur toga í hár stúlkna. Það er áreitni. Daður er algjörlega bannað. Þó það sé list og dans sem engan særir.

Karlmenn verða að passa sig sérstaklega vel á sínum vinnustað að segja enga klámbrandara, tala um flottar konur eða vísa til kvenna á nokkurn hátt. Annars verða þeir kallaðir á teppið. Ekkert má lengur. Groddalegum karlahúmor hefur verið fleygt á bálköst sögunnar.

Nú ráða konur öllu og við karlar fáum að gjalda fyrir syndir feðra okkar.

Get svarið það að mér sýndist sjá Svandísi nudda saman höndunum af tilhlökkun yfir að fá að herða tökin aftur og banna okkur eitthvað í kjölfar frétta um einhvern fávita nýkominn frá útlöndum með breska afbrigðið. Aldrei þessu vant er ég sammála krökkunum í Viðreisn og Sjálfstæðis um að auðvelt er að svipta fólk frelsi en mun erfiðara að fá það til baka.

Er ansi hræddur um að Bjórólfur og Djammdís munu fyrst banna þyrstu fólki að heimsækja öldurhús. Bara hlýtur að vera ölvuðu fólki að kenna að veiran er komin aftur á kreik. Svo fá steratröllin á kjaftinn og Bjössi í World Class neyðist til að skella í lás. Leikhús og veitingastaðir fá hinsvegar að hafa opið fyrir efri millistéttina sem kom með þennan bansettan vírus aftur inn til landsins, fór beint á vaktir á Borgarspítalanum og svo að sjá Víking Heiðar í Hörpu. Gott ef eitt stykki fermingarveisla var ekki líka á dagskránni.

Löngu orðið ljóst að yfirvöld með afturhaldskommatitti innanborðs munu seint leyfa íslenskum almenningi um frjálst höfuð strjúka á ný. Til þess er freistingin til að banna og stjórna of sterk. Það verður eins og að draga tönn úr trölli að fá smá tilslakanir. Eða þar til almenningur gefst loks upp, sendir stjórnvöldum löngu töng og losar um höftin á eigin vegum.