Dómur er fallinn. Ég hvílist lítið sem ekkert á nóttunni sökum kæfisvefns. Kemur mér ekki beint á óvart. Hef í lengri tíma rétt haft orku í vinnuna og búið. Sem gengur eiginlega ekki ef maður ætlar að sprikla eitthvað fyrir eða eftir vinnu. Auk þess er kæfisvefn bara stórhættulegur til lengdar. Getur til dæmis keyrt upp sykursýki og aukið álag á hjartað.

Fékk eitthvert tæki heim til að mæla svefninn. Plús að þurfa ekki lengur að sofa upp á spítala. Og núna í kjölfar niðurstöðunnar fæ ég annað tæki heim sem á að hjálpa mér að anda rétt meðan ég sef. Einhvers konar ryksugu sem kemur í veg fyrir öndunarstopp og bætir súrefnismettunina. Tæki sem ég hefði átt fyrir löngu að vera búinn að fá.

Hef verið syfjaður og þreyttur í mörg ár. Hélt að það væri bara eðlilegur fylgifiskur þess að vera of þungur. Nú sé ég fram á bjartari tíð með blóm í haga og öndunargrímu yfir smettið meðan ég sef. Sem er lítið gjald fyrir góðan nætursvefn og aukna orku yfir daginn. Grennist víst lítið ósofinn og asnalegur.

Ég var ekki beint upplagður í Berlínarför í næsta mánuði eftir að fyrstu fréttir af Germanwingsslysinu tóku að berast. Hef ekki stigið upp í flugvél í sjö ár og var ekki alveg sama þrátt fyrir að hafa aldrei beint verið flughræddur. Og vélin sömu tegundar og ég mun fljúga með, nema bara mun eldri.

Svo hefur þunglyndi aðstoðarflugmannsins komið í ljós og hvernig hann stýrði vélinni á fjallið. Greyið fólkið. Hvers átti það að gjalda! Og hurðin sem átti að verjast hryðjuverkum varð til þess að flugstjórinn gat ekki komið í veg fyrir harmleikinn. Ömurlegt!

Spurning hvort að nokkurn tíma sé alveg hægt að koma í veg fyrir svona atvik. Jafnvel þó aðrir úr áhöfn séu sendir inn á meðan annar hvor flugmaðurinn bregður sér frá. Erfitt að sjá á fólki sem gælir við að kála sér. Og hvað hefði flugþjónn eða flugfreyja getað gert? Yfirbugað gaurinn?

Nei, þetta er falskt öryggi sem tryggir ekki neitt. En það eru líka flugferðir upp að vissu marki. Við fullvissum okkur sjálf með gömlu, góðu möntrunni um að mun meiri líkur séu á að týna lífi í bíl en flugvél. Annars myndum við sennilega ekki þora um borð í þessar síldartunnur loftsins.

Samfylkingin er dauð eftir formannskjör upp á eitt atkvæði. Kjörinn og óvinsæll formaður er dauður (dead in the water). Réttast væri að hann segði af sér svo flokkurinn fengi að blómstra. Rétta sig af.

En nei, sólbrunni gaurinn ætlar að halda áfram á þrjóskunni einni saman. Eyðileggja flokkinn og senda hann niður í óþekktar fylgistölur. Eigingirni maximus!