Var varla kjaftur á Dominos þegar ég sótti slydduna mína.  Sennilega flestir heima hjá sér að berjast við meltingartruflanir og of háan blóðþrýsting.  I told you so!

Eins og með þorraviðbjóðinn þá fæ ég stundum á tilfinninguna að fólk þykist elska saltkjöt af ótta við álit annarra.  Rétt eins og það sé óþjóðlegt að neita sér um óþverrann sem vesalingarnir fyrr á öldum neyddust til að setja ofan í sig.

Mér er andskotans sama.  Þjóðhollusta snýst um að elska land okkar og tungu.  Ekki skemmdar matvörur frá fyrri tíð.  Þessu skylt er árátta íslenskra karla að hrúgast upp á fjöll og fyrnindi til að murka lífið úr litlum fuglum og sætum hreindýrum.

Aldrei þessu vant át ég ekki yfir mig af rjómabollum og kjötbollum.  Allt er gott í hófi.  Nenni líka ekki að sitja á könnunni í alla nótt.  Saltkjöti og baunasúpu sleppi ég alveg.  Get rétt eins sturtað iðnaðarsaltinu beint ofan í mig úr pokanum og svo pantað sjúkrabíl.

Ætti að kalla Sprengidag Háþrýstingsdag.  Sennilega næst besta mætingin á bráðamóttökuna yfir árið þennan dag fyrir utan Jólin.  Fólk passar sig ekki og skóflar í sig söltuðu kjöti og saltaðri súpu í hádeginu og líka um kvöldið.  Og skilur svo ekkert í vanlíðaninni.

Þá er ég nú gingeyptari fyrir flatböku frá Dominos.  Það er Megavika!

Bjánarnir í Íran ræskja sig og forstjóri eins olíufélaganna sprettur strax fram á netinu og boðar mögulega hækkun á eldsneyti.  Allt skal notað til að skara fleiri krónur að kassanum.  Jafnvel þó að megnið af okkar bensíni komi frá Rússlandi.

Væri ekki ráð að breyta þessum sólarhringssjoppum aftur í bensínstöðvar með almennilegri þjónustu og vöruúrvali.  Myndi kannski minnka rekstrarkostnaðinn og stuðla að lægra verði á lítranum.

Fólk fattar þetta ekki og hangir næturlangt á þessum stöðvum með kúkinn í buxunum í stað þess að drulla sér í bælið.  Aldrei lét ég sjá mig á slíkum búllum eftir vinnu.  Ekki nema að ég fengi borgað fyrir það.