Nýtti mér fágætt tækifæri til að virðast eðlilegur þegar ég heimsótti Dr. Krabba í Mjóddina. Er enn í góðum málum og engin breyting. Á víst að geta lifað með þessu fram á elliár.

Var ekki tekinn til yfirheyrslu af lögreglunni eins og forðum. Og slapp við að vera rændur af furðufuglunum sem venja komur sínar þangað.

Staulaðist um á hnéhjólinu í leit að hraðbanka Arion. Fann hann loks inn í Nettó. Er hvorki fugl né fiskur. Bara hægt að taka fé út úr honum. Ekki greiða reikningana hennar mömmu sem er ekki enn komin með heimabanka. Verð að reyna að tengja Auðkennisappið svo ég get sinnt hennar málum á netinu.

Notaði tækifærið og brunaði í gegnum Nettó áður en Pant skutlaði mér aftur heim. Ætlaði að koma við á Subway en hætti við því sjoppan var full af einhverjum dúddum á unglingsaldri. Hefði ekki sloppið lifandi þaðan út.

Var gaman að renna í gegnum matvöruverslun upp á gamla mátann í stað þess að panta heim á netinu. Missti mig aðeins. Ætlaði bara að grípa nokkra hluti með mér en þeir margfölduðust áður en komið var að kassanum.

Sumarið sem aldrei kom er á enda runnið. Helvítis haustið dynur á okkur og svíkur engan.

Enn hangi ég heima eins og hor upp á vegg. Örlög mín í höndum einhvers skosks andskota sem vill ekki leyfa mér að mæta aftur til vinnu fyrr en eftir enn eina myndatökuna. Röntgen í þetta skiptið og það á hinum fætinum.

Jafnvel þó veiki fóturinn sýni talsverð batamerki. Átti jafnvel að fá að stíga aðeins í hann í tilraunaskyni. En, nei! Alltaf einhver ný ástæða til að halda mér lengur heima og frá vinnu. Markmiðið virðist vera að koma mér á örorku. Að minnsta kosti sjá til þess að ég missi starfið vegna of langrar fjarveru.

Get að minnsta kosti ekki lifað lengi á sjúkradagpeningum frá Sameyki. Neyðist sennilega til að segja mig á sveitina þegar þá þrýtur fyrir jól.

Sigurður Ingi og Bjarnabófinn vilja ekki á það hlusta. Kosningar verða í haust ef þeir fá að ráða. Svandís Svavarsdóttir er alveg til í kosningar í vor.

Ég vil kosningar núna. Til hvers að framlengja þetta óheilaga samstarf eitthvað lengur. Hvað þá eftir brotthvarf Katrínar sem var límið sem hélt þessu saman í heil sjö ár.