Minn helsti ljóður er að ég er allt of eftirlátsamur. Umber slæma hegðun gagnvart mér allt of lengi í þeirri von að hún batni með tímanum. Sem hún gerir náttúrulega aldrei.

Klassísk hegðum barns alkahólista. Hin eilífa von um betri tíð eftir síðustu helgi Helvítis. Að næsti föstudagur verði betri; laugardagur skárri og sunnudagur jafnvel góður. En sjaldnast rættist sú von.

Ofeldaður lambahryggur sem enginn hafði lyst á seint á sunnudagskvöldi í ofninum. Skítþunnir foreldrar enn undir sæng.

Og nú er svo komið að ég neyðist til að láta af eftirlátseminni og gerast ákveðinn. Setja niður fót og segja hingað og ekki lengra! Að ég láti ekki bjóða mér svona aðstæður lengur.

Það verður ekki fallegt og þið verðið að fyrirgefa mér eigingirnina og ofbeldið.

Vaknaði um daginn eftir miklar og erfiðar draumfarir sem sögðu mér að hætta að vera svona eftirlátsamur og setja fótinn niður þegar einhver er að vaða yfir mig á skítugum skónum. Mótmæla í stað þess að leyfa drullunni að ganga yfir mig mótþróalaust.

Þarna hefur faðir minn heitinn sennilega verið að senda mér skilaboð gegnum móðuna miklu. Maður sem leyfði engum að valta yfir sig án þess að fá að minnsta kosti kjaftshögg að launum fyrir viðvikið. Margtuggði ofan í mig að hlýða aldrei skipunum því ég væri ekki fæddur þræll, og að leyfa engum að vaða yfir mig með frekju og yfirgangi.

Ég hef fylgt þessum ráðum misvel í gegnum lífið og forðast að þurfa beita ofbeldi til að verja minn hlut. Frekar lúffað og leyft frekjum vaða yfir mig í von um að vera látinn í friði þaðan af.

En ekki lengur eftir þennan draum. Verð bráðum fimmtugur. Tími til kominn að sýna einhvern kjark og slá til baka þegar frekjur reyna að vaða yfir mig á skítugum skónum. Kannski ekki á sama máta og faðir minn sem kýldi gaura umsvifalaust í gólfið ef þeir voru með kjaft. Reyni að ræða aðeins við þá áður en vinstri krókurinn kemur og neglir þá niður. Gef þeim smá séns.

Einhver Beggi sálfræðinemi hefur ákveðið að gerast hinn íslenski Jordan Peterson / Andrew Tate og netheimar hafa réttilega farið á hliðina og fordæmt hann til Helvítis.

Við nennum ekki svona gaurum. Af hverju panta þeir sér ekki hótelherbergi saman og sleikja punginn á hvorum öðrum í stað þess að bögga okkur hin með leiðindum sínum?