Sex vikur án göngutúra og inniveru taka sinn toll. Allt þol er horfið og ég kemst varla á milli herbergja án þess að standa á öndinni.

Pantaði sitthvað með Heimkaup um helgina því engin sendingargjöld voru í gildi. Eins og síðast þá hringdi sendillinn og sagðist vera fyrir utan. Ég spurði á móti hvort að hurðin virkaði ekki og hann svaraði nei.

Auminginn ég brunaði á hnéhjólinu niður með lyftunni. Á móti mér mættu mæðgur nýkomnar í gegnum útidyrnar með hjálp dyrasímans. Fyrir utan stóð sendillinn. Sem betur fer bauðst gaurinn til að bera pokana með mér upp á þriðju hæð þegar hann sá ástandið á mér og ég þakkaði kærlega fyrir.

Eitthvað er að rofast til í akstursþjónustunni. Kemur í ljós í vikunni. Langar bara svo til að mæta aftur til vinnu. Er að verða geðveikur á Netflix og hangsi heima étandi netpantaðan mat. Þessi fótur er ekkert að fara lagast á nokkrum vikum. Sumar og haust verða undirlögð af heltu og leiðindum.

Tékkið í dag var svo sem í lagi. Hitinn fer smá saman lækkandi í fætinum. Þolinmæði þrautir vinnur allar. Alltaf einhverjir nemar og gestir viðstaddir. Einhver sleði sló um sig og tjáði mér í óspurðum fréttum að ég þyrfti að láta sérsmíða á mig skó í framtíðinni til að vernda iljarnar fyrir meiðslum. Nota þykk innlegg og bla bla bla my ass. Hefur gaurinn aldrei heyrt um öryggisskó með stálplötu í botninum!

Hringdi í flesta augnlækna höfuðborgarsvæðisins til að panta tíma. Biðin frá tveimur upp í níu mánuði. Virðast engir nýir bætast við stéttina og minn fór á eftirlaun fyrir tveimur árum. Hefði betur pantað tíma um leið og hann hvarf út á golflendurnar. Huggun harmi gegn að ég er á biðlista hjá stofu rétt hjá vinnunni. Ætti að geta skotist samdægurs ef tími losnar.

Frekjuhundurinn fékk sínu framgengt og verður forsætisráðherra. Langt í frá sami mannasættirinn og Katrín sem hélt þessu samstarfi þriggja ólíkra flokka gangandi í næstum sjö ár. Verður stutt í næstu alþingiskosningar.

Eftir frekari umhugsun þá vil ég Jón Gnarr sem forseta. Veislurnar á Bessastöðum yrðu mjög skemmtilegar og hann myndi aldrei nenna nema einu kjörtímabili rétt eins og í borginni. Fengjum því að kjósa aftur að fjórum árum liðnum. Sem er gaman.

Kata getur haldið áfram að skrifa glæpasögur. Næsta yrði um samstarfið við flokkana tvo. Baldur getur haldið áfram að kenna leiðindi við Háskóla Íslands. Er ekki viss um að Felix komi honum í embætti rétt eins og Guðrún Katrín gerði fyrir Ólaf Ragnar 1996.

Annars er öll kosningabaráttan framundan. Margt getur breyst á sjö vikum. Jafnvel einhver enn annar frambjóðandi skotist fram úr þremur efstu.