Útkastarar verða settir í vagna strætó eftir áramót til að sekta og fleygja út farþegum sem svíkjast um að greiða rétt fargjald. Sem sagt ef Klappið virkar ekki, þá verður manni fleygt öfugum út með látum. Jeeiiii! Og nota bene, Klappið virkar ekki!

Eins og það sé ekki nógu leiðinlegt að ferðast með þessu fyrirtæki. Væri ekki bara ódýrara að gefa frítt í strætó og losa sig við dyraverðina og Klappið? Og nokkra bílstjóra í leiðinni sem eru augljóslega tæpir á geði.

Jæja, verð víst bráðum að rífa upp veskið og greiða gítargutlara út í bæ bætur fyrir að taka þátt í umræðum á netinu um meinta ásókn hans í stúlkur undir lögaldri. Bara af því að ég reif kjaft á netinu fyrir nokkrum árum í sumarleyfi með nokkra kalda á kantinum. Segi svona.

Kennir manni að halda kjafti og vera ekki að fetta fingur út í miðaldra gaura sem krúsa eftir tónleika í leit að ungum stúlkum til að staura. Dómskerfið er nefnilega með þeim í liði. Ekki stúlkunum. Eða okkur sem bendum á fáranlega löggjöf sem leyfir svona rugl.

Eflaust er ég frekar tregur því ég skil ekki af hverju íslensk stjórnvöld og þá helst Bjarni Ben. styðja þjóðarmorð á Gazabúum. Skilst að þar búi einhver viðskiptasambönd að baki við Ísrael sem þarf að vernda fyrir einhverja innvígða og innmúraða flokksmenn.

Stríð eru oftar en ekki háð af misvitrum stjórnmálamönnum sem þurfa sjálfir aldrei að lyfta vopni og berjast fyrir lífi sínu. Geta þeir ekki bara tekið upp gamla einvígið. Mæst í morgunþoku með sitt hvort vitnið, dómara og framhlaðna skammbyssu. Gert út um deilumál sín og hlíft okkur hinum við egóinu sínu.