Eftir að hafa kyngt þá er stuttur vegur að því að taka það í rassinn. – Nei, ég er ekki að tala um kynlíf.

Eftir magaspeglun fyrir mánuði síðan mætti ég í ristilspeglun í dag. Eins og aldurhnignir menn eiga að gera í kringum fimmtugt. Alls ekki eins mikið mál og ég var búinn að mikla fyrir mér. Sérstaklega ekki ef engir separ eða önnur mein finnast.

Er hinsvegar með Helicobacter pylori bakteríuna eins og meira en þriðjungur fólks. Hún veldur bólgum sem geta leitt til magasárs. Fer á viku lyfjakúr til að fjarlægja hana úr maganum. Bakterían smitast sennilega með drykkjarvatni og svo milli ættliða (móðir/sonur). Bæði móðurafi minn og mamma fengu magasár svo ég er ekki hissa.

Er þrátt fyrir allt bara í nokkuð góðum málum eftir að hafa kyngt og tekið það í rassinn. Næsti viðkomustaður er Grindr….DJÓK. – Farið endilega í tékk. Skaðar ekkert að láta líta undir vélarhlífina öðru hverju. Fyrirbyggja þannig verri útkomu síðar á lífsleiðinni.

Lengi hef ég reynt að berjast gegn leiðindum sóttvarnalæknis. Takmörkunum um hve mörg okkar megum koma saman hverju sinni og skerðingu á opnunartíma veitingastaða. Nenni því ekki lengur. Algjör tímasóun sem breytir engu.

Stemningin virðist vera sú að þessi gaur eigi að fá að og fái að ráða öllu fyrir og eftir kosningar. Alveg sama hvaða flokkar fari með næstu stjórn. Til hvers erum við þá að kjósa? Er lýðræðið ekki dautt þegar embættismenn fá að ráða öllu sama hvað?

Er því hættur að tjá mig um Covid-19 á þessum vettvangi. Og er að hugsa um að hætta að tjá mig algjörlega á netinu. Og spara þannig fullt af tíma sem má nýta í eitthvað uppbyggilegra.

Næsta skref er að loka öllum aðgöngum að wordpress, facebook, twitter og instagram.

Síðustu tvær eða þrjár vikur hef ég meðvitað látið vera að tjá mig í athugasemdakerfum. Í hvert skipti sem mig hefur klæjað í fingurgómana, hef ég í staðinn gripið penna og skrifblokk og látið vaða. Og það hefur virkað vel. Orðin rata á pappír í stað netsins.

Vakna mun sáttari daginn eftir þess vitandi að ég lét ekki ginna mig út í algjörlega gagnlausa umræðu um ekki neitt sem skiptir nokkru máli. Að tjá sig á netinu er eins og að tala við krepptan hnefa.

Að rífast við rasshausa, apaheila og þverhausa í athugasemdakerfum netmiðla er svo mikil sóun á tíma að það hálfa væri nóg. Bróðurpartur heillar viku sumarleyfis míns fór í að munnhöggvast við typpalinga á netinu sem skildu ekki af hverju viss veðurguð fengi ekki að sjá um brekkusöng á Þjóðhátíð sem ekkert varð að. Algjör sóun á annars góðu fríi.

Sést best á öllum viðbjóðnum sem hefur lent á fórnarlömbum og öðrum sem hafa bent á þöggunartilburði KSÍ. Formaður þess hefur nú þegar sagt af sér, en af hverju ekki öll stjórnin! Á typpamenningin bara að fá að halda áfram. Eiga strákarnir okkar bara áfram að fá að vaða yfir stúlkur með klofgripi og hálstaki ef þær vilja ekki þýðast þá?