Gerðist í eldgömlum og úr sér gengnum Irisbus strætisvagni með númerinu EF – 930.

Ég spotta laust sæti aftast í vagninum og held þangað. Um leið og ég geri mig líklegan til að setjast og koma bakpokanum fyrir, þá botnar bílstjórinn bíldrusluna með þeim afleiðingum að ég flýg í vegginn aftast og missi bæði símann minn og bakbokann. Rétt næ að halda mér á fótum með því að krækja utan um eina stöngina. Hrópa um leið „helvítis fíflið þitt“ að bílstjóranum, enda ekki fyrsta skipti sem ég hef ferðast með þessum fýlupoka, durg og dóna.

Lætur farþegana alltaf ganga að vagninum. Stöðvar langt fyrir aftan eða framan farþegahópinn svo við þurfum að ganga smá spöl að vagninum. Býður aldrei góðan daginn. Og gefur duglega í svo við fáum nú örugglega smá flugferð áður en við setjumst.

Þetta er ástæðan fyrir því að bara furðufuglar eins og ég nenna að ferðast með strætó. Dóna- og durgsleg hegðun bílstjóra og úr sér gengnir vagnar sem ættu fyrir löngu að vera búnir að fá kærkomna hvíld.

Það er engu líkara en að allir séu að bíða eftir þessari blessaðri Borgarlínu sem mun sennilega seint eða aldrei koma, og ef þá, í mjög útvatnaðri mynd. Á meðan mega vagnar Strætó grotna niður og æ vonlausari bílstjórar stýra þeim.

Myndi kaupa mér bíl strax á morgun ef ég ætti einhvern aur. En þangað til ég vinn þann stóra, neyðist ég víst til að ferðast með Strætó og leyfa bílstjórum eins og þessum ulla á mig og niðurlægja.

Hvað ætli að það séu margar nefndir að störfum í landinu um þessar mundir? Þúsund og eitthvað bara skipaðar af Alþingi. Svo úrskurðarnefndir um alla skapaða hluti, skipaðar reiðum, litlum lögfræðingum úr stuttbuxnadeild Sjálfstæðisflokksins. Loks eftirlitsnefndir yfir öllum sköpuðum hlutum, skipaðar flokksgæðingum fjórflokksins.

Svona eins og þessi sem fylgist með lögreglunni og skammar þegar þau hósta í átt að flokknum eða meðlimum hans sbr. Ásmundarsalarmálið. Lögreglumennirnir skammaðir fyrir að hafa komið auga á framapotara flokksins í veislunni og nefnt það í búkvélarnar sínar. Bjarni Ben. fær hinsvegar ekki svo mikið sem sekt fyrir að brjóta sóttvarnarreglur.

Fjölmiðlanefnd vakir yfir öllum eins og haukur, stofnar svo eigin fjölmiðil og kallar hann Fjórða valdið og með því rekur löngutöng framan í gjörvalla blaðamannastéttina. „Við gerum það sem okkur sýnist en þið fáið aðeins að gera það sem við leyfum“. Félagi Napóleón enn og aftur.

Stundum finnst mér eins og að nefndir séu býsna einsleitar. Skipaðar fólki úr sömu fjórum flokkunum og þá aðallega lögfræðimenntuðu fólki sem vantar eitthvað að gera að námi loknu og fær þarna inni þar til eitthvað betra býðst. Einu kröfurnar eru að geta barið saman neitunarbréf með smá rökum og tilvísanir í dómafordæmi og lagabálka. Í sem fæstum orðum að blása reyk upp í rassgatið á kærendum og draga úr þeim kjarkinn.

Leggjum niður allar nefndir og ráð. Getum sennilega greitt upp fjárlagahalla veirunnar, greitt öldruðum og öryrkjum mannsæmandi lífeyrir og átt einhverjar krónur eftir á einu kjörtímabili.

Gaman að finna hve létti yfir samfélaginu eftir afléttingu allra takmarkana vegna Covid-19. Er samt smá smeykur að ferðast grímulaus með strætó. Sérstaklega eftir heimferðina á laugardaginn þar sem parið fyrir aftan mig samkjaftaði ekki milli þess sem að þau hóstuðu á hnakkann á mér. Voru víst að fara út að borða niður í bæ og bara af því að þau voru svona tillitslaus þá lét ég vera að benda þeim á Borg29 mathöll. Vildi ekki að þau færu að hósta yfir alla þar.

Hef tekið eftir því að sprittstöðvum verslana er ekki sinnt eins vel og fyrir afléttingu. Margar tómar eða við það að tæmast. Megum ekki sofna á verðinum með persónulegar sóttvarnir. Jafnvel þó að unga fólkið hafi hópast nærbuxnalaust niður í miðbæ í sleik við vini sína og hópkynlíf eftir djammið. Djók!

Vonandi haldast smitin áfram við landamærin. Við nennum ekki frekari takmörkunum. Fögnum frelsinu af ábyrgð.