Næsta hrun er í undirbúningi.  Byggingarkrönunum fjölgar með hverjum deginum og pólskir byggingarverkamenn eru aftur farnir að fylla götur og strætisvagna borgarinnar.  Fimm prósent skráð atvinnuleysi og erlent vinnuafl er flutt inn fyrir næstu húsnæðisbólu.  Má ekki kosta of mikið.

Atvinnuleysið er í raun mun meira.  Eru bara svo margir komnir á framfæri bæjarfélaganna eftir að hafa fullnýtt rétt sinn til atvinnuleysisbóta og teljast ekki með.  Allt skal líta vel út á yfirborðinu.  Kreppan á víst að vera að baki samkvæmt núverandi (en vonandi skammvinni) ríkisstjórn.

Umpólun hefur orðið í stjórnmálum landsins eftir hrun.  Áður eyddu vinstri flokkar og söfnuðu skuldum meðan hægri flokkar tóku til í ríkisfjármálum og greiddu upp skuldir.  Núna setja hægri flokkar landið á hausinn með reglulegu millibili og vinstri flokkar taka til eftir þá milli hruna.  Og kjósendur halda áfram að vera hálfvitar upp til hópa sem trúa kosningaloforðum.

Nú er verið að taka Hildi Lilliendahl af lífi á netinu.  Fólk verður víst að vera fullkomið til að geta tjáð sig um karlrembu á vefnum.  Aldrei hafa tjáð sig á barnaland.is undir öðru nafni og egói.

Hefði verið svona mikið fjölmiðlafár yfir orðum karlmanns?  Held ekki.  Honum hefði fyrirgefist allt.  Sérstaklega ef hann hefði játað að hafa skrifað allt undir áhrifum áfengis.

Veit ekki um þig, en ég fyrirgef Hildi heilshugar og held áfram að lesa allt sem frá henni kemur.  Raddir eiga að fá að hljóma.  Ekki vera kveðnar í kútinn af misvitrum ritskoðunarlöggum fyrir gamlar syndir.  Líttu þér nær!  Sá yðar sem syndlaus er kasti fyrsta steininum!

Ofsagleði kvenhatara og karlremba yfir örlögum Hildar er sorgleg.  Halda að með því að múlbinda hana muni baráttan fyrir jafnrétti kynjanna deyja út og þeir fá að kúga áfram.  Þvílíkir fávitar!

Varnagli.  Landsfundur og flokksþing eru þjóðin.  Var aldrei ætlunin að kjósa. Einmitt þegar ég tel næga heimsku komna upp úr Framsóknarflokknum bæta þau um betur. Hrokinn svoleiðis lekur af þessu liði.  Það voru jú kosningar í fyrravor.

Við eigum bara að hafa okkur hæg næstu þrjú árin og leyfa þeim að loka fyrir alla möguleika okkar gagnvart Evrópu.  Leyfa þeim frekar að selja landið í hendur á Rússlandi sem er í töluðum orðum að ráðast inn í Úkraníu og Kína sem ætlar sér að legga undir sig heiminn með góðu eða illu.  Helst með dollurum og evrum.

Bjarni Ben. situr steinhissa í stofunni sinni í Garðabæ yfir viðbrögðum þjóðarinnar. Skilur þau ekki.  Var jú bara að svíkja kosningarloforð.  Er búinn að gleyma að flokkurinn hans hefur ekki verið þekktur fyrir að svíkja sín örfáu kosningarloforð í gegnum tíðina.

Gunnar Bragi búðarloka frá Skagafirði og víst utanríkisráðherra blasti við mér fyrir utan A4 við Smáratorg í gær.  Því miður með syni sínum því annars hefði ég kannski rokið á hann og skallað hressilega frá meirihluta þjóðarinnar sem vill kjósa um áframhald viðræðna við Evrópusambandið.

Átta þúsund manns mættu á Austurvöll til að mótmæla í gær.  Önnur búsáhaldabylting er að myndast vegna valdníðslu ríkisstjórnarinnar.  Sem er gott og þarft.  Þetta lið átti aldrei að komast aftur að kjötkötlunum svona skömmu eftir hrunið.  En gerðu það með því að vera á móti Icesave og lofa skuldaleiðréttingu sem reynist hvorki vera fugl né fiskur.

Leiðréttum mistökin og mótmælum í gegn nýjar Alþingiskosningar samhliða sveitastjórnarkosningum í vor.  Ísland má ekki við þremur árum í viðbót með þessa ríkisstjórn sérhagsmuna gagnvart þjóðarhagsmunum.