Hef verið að lesa átakanlegar lýsingar fórnarlamba nauðgana á drusluganga.org. Eftir nokkrar sögur var ég orðinn svo reiður að gat ekki meira í bili. Blóðþrýstingurinn fór upp úr öllu valdi.  Verð að skammta mér tvær til þrjár frásagnir á dag.

Lýsingarnar höfðu slík áhrif á mig að ég fór að skammast mín fyrir að hafa fæðst karlkyns.  Djöfulsins aumingjar sem kynbræður mínir geta verið!   Þeir sleppa nær alltaf undan réttvísinni og skömminni sem þolendurnir þurfa að burðast með vegna þess að íslenskt samfélag trúir konunum sjaldnast.

Hún hlýtur að hafa kallað nauðgunina yfir sig með druslulegum klæðnaði, daðri eða ölvun.  Af hverju var hún að bjóða manninum með sér heim?  Misskildi hún ekki bara eitthvað?  Af hverju gekk hún einsömul heim?  Hvað er þetta, hann gat ekki vakið hana til að spyrja leyfis.

Stundum finnst mér eins og lítið hafi breyst síðan fyrr á öldum þegar konur gátu ekki gengið óhultar milli bæja án þess að eiga á hættu að einhver andskotinn kæmi hlaupandi á eftir þeim með buxurnar á hælunum.  Þá eins og nú þýddi lítið að kæra atburðinn því sjaldnast eru önnur vitni en gerandinn og þolandinn.  Orð gegn orði.

Gillz laus allra mála af fyrri kærunni og Guðbergur Bergsson af öllum mönnum tekur upp hanskann fyrir hann og gerir lítið úr stúlkunni sem kærði Egil og kærustuna hans.  Lögmenn Störe velta því í kjölfarið fyrir sér hvort að umbjóðandi þeirra eigi að fara í mál við hálfa þjóðina vegna ummæla í athugasemdakerfum auk þess að heimta rannsókn á aðdraganda þess að stúlkan kærði þau fyrirmyndarparið yfirleitt.

Flestir myndu nú bara fegnir um frjálst höfuð strjúka og halda kjafti í framhaldi af því.  En nei, ekki verjendur Egils Einarssonar sem finnst vegið að drengnum að fá ekki að stunda trekant í friði fyrir femínistum þessa lands.  Því allt var þetta víst tómur misskilningur hjá stelpunni.  Auk þess er mamma hennar í Vinstri-Grænum.  Slíkt fólk hatar eðlilega Gillzenegger sem trúir á frjálsar ástir (óháð samþykki hins aðilans).

Náungi sem hefur hótað nafngreindum konum nauðgunum á netinu getur ekki ætlast til að fá blíða meðferð þegar hann er svo loks kærður fyrir nauðgun.  Jafnvel þó honum og FM-hnökkunum vinum hans hafi þótt það þrælfyndið á sínum tíma að ætla láta konur sem líkuðu ekki talsmáti hans fá einn „beinstífann“ í „loðin klofin“.

Lögmenn fjarþjálfarans frækna gefa í skyn að pólítík hafi stjórnað því að hann og kærastan voru ákærð.  Að á bak við ljúgandi stúlkuna standi VG og femínistar í persónulegri herferð gegn honum. Gott og vel.  Má þá ekki alveg eins gefa í skyn að hann hafi sloppið við réttarhöld því í rassvasa hans hvílir helblátt flokksskírteini? – Nei, ég segi bara svona.

Einhver bölvuð kvefpest búin að ná mér.  Var svona líka í gær niður á Rútstúni.  Lét mig samt hafa það að hökta þar á eftir mömmu.  Maður vogar sér ekki að segja nei við nýbakaða langömmu.  Hafði svo sem gott af því að hlunkast aðeins úti í hreina loftinu og rekast á fólk.

Hið góða við að sækja viðburði í Kópavogi er að þar drukknar maður ekki í mannfjölda.  Hittir vini, kunningja og nágranna.  Á ekki í hættu að verða sektaður fyrir að leggja bílnum upp á gangstétt eða úti á túni.  Og það eru kvöldtónleikar í Kópavogi fyrir blessaðar gelgjurnar.

Besti flokkurinn í Reykjavík ætti að heita Leiðinlegasti flokkurinn.  Þau eru bara talsmenn leiðinda. Slógu af kvöldtónleikana.  Hótuðu að sekta fólk sem fann ekkert stæði fyrir bílinn sinn.  Og sýndu hundaeigendum fingurinn.  Verður „gaman“ að sjá hvernig þau munu klúðra Gleðigöngunni og Menningarnótt.

„Það er gott að búa í Kópavogi!“