Jæja, verð víst bráðum að rífa upp veskið og greiða gítargutlara út í bæ bætur fyrir að taka þátt í umræðum á netinu um meinta ásókn hans í stúlkur undir lögaldri. Bara af því að ég reif kjaft á netinu fyrir nokkrum árum í sumarleyfi með nokkra kalda á kantinum. Segi svona.

Kennir manni að halda kjafti og vera ekki að fetta fingur út í miðaldra gaura sem krúsa eftir tónleika í leit að ungum stúlkum til að staura. Dómskerfið er nefnilega með þeim í liði. Ekki stúlkunum. Eða okkur sem bendum á fáranlega löggjöf sem leyfir svona rugl.

Eflaust er ég frekar tregur því ég skil ekki af hverju íslensk stjórnvöld og þá helst Bjarni Ben. styðja þjóðarmorð á Gazabúum. Skilst að þar búi einhver viðskiptasambönd að baki við Ísrael sem þarf að vernda fyrir einhverja innvígða og innmúraða flokksmenn.

Stríð eru oftar en ekki háð af misvitrum stjórnmálamönnum sem þurfa sjálfir aldrei að lyfta vopni og berjast fyrir lífi sínu. Geta þeir ekki bara tekið upp gamla einvígið. Mæst í morgunþoku með sitt hvort vitnið, dómara og framhlaðna skammbyssu. Gert út um deilumál sín og hlíft okkur hinum við egóinu sínu.

Formaður lögmannafélagsins og forsætisráðherra eru þvílíkar lyddur að það hálfa væri nóg. Geta engan veginn staðið með eða aðstoðað íslenska móður sem norska ríkið er að valta yfir með framsali til Noregs í öryggisfangelsi fyrir hryðjuverkamenn. Mætti halda að hún hafi myrt einhvern þegar hennar eini „glæpur“ er að vernda syni sína þrjá fyrir vanrækslu föður þeirra.

En nei, norska ríkið fer fram í sínu venjulega offari í barnaverndarmálum þar sem feðrum er oftar dæmt forræði yfir sonum og ullað framan í mæður sem synirnir vilja heldur dvelja hjá. Vilji barnanna er ekki virtur heldur frekja óhæfra feðra og dómsorð karllægs kerfis látið ráða. Feðraveldið fer sínu fram óháð vilja barnanna.

Af hverju þorir enginn að stíga fram, berja í borðið og segja hingað og ekki lengra. Við ætlum varla að leggjast flöt undir norsk barnaverndaryfirvöld sem eru þekkt um hinn vestræna heim fyrir óbilgirni og hrottaskap gagnvart mæðrum og undirgefni fyrir feðrum.