Vöövastrumpur átti afmæli og hélt svaka veislu með Exit-þema. Eftir norskum þáttum um ofurríka aumingja og svallveislur þeirra þaktar kókaíni, melllum og viðbjóði. Eitthvað svo í takt við allt sem þessi kjötaði kauði og vinir hans hafa tekið sér fyrir hendur í gegnum tíðina. Og fólk mætti unnvörpum til að láta taka af sér myndir sokkalaust í mokkasíum með handtöskur í hendi.

Fótboltastrumpur sneri aftur á Klakann eftir að hafa stungið í stutta stelpu í útlandinu og sætt rannsókn fyrir. Allt fyrirgefið og öll lið bera í víurnar við hann. Jafnvel norski landsliðsþjálfarinn. Við elskum breyska menn. Þetta var bara misskilningur og stúlkan hóra í leit að peningum. Gott ef albanska mafían og George Soros voru ekki eitthvað viðriðin málið.

Rappstrumpur er enn eitt fyrirbærið sem er upphafið fyrir enga hæfileika. Er sem stendur með að minnsta kosti fjögur lög á Íslenska listanum. Lög sem eru algjör drulla og hljóma öll eins. Enn ein fótboltahetjan sem komst ekki í atvinnumennsku og ætlar í staðinn að verða rappstjarna með góðum fjárhagslegum stuðningi frá afa sínum. Vonandi er þetta bara auglýsing fyrir súkkulaði.

Ömurlegt að sjá viðbrögð Katrínar, Bjarna og Sigurðar í Silfrinu við ummælum Ingu í Flokki fólksins um að fátækt barna hefði aukist í stjórnartíð þeirra. Vísuðu bara til rannsókna einhverra sérfræðinga og þóttust ekkert kannast við að á Íslandi færu börn svöng í háttinn eða stæðu í húsnæðishraki.

Þægilegt að dvelja sáttur í sínum bergmálshelli allsnægta og hvorki trúa né skilja að til sé fólk sem býr við fátæktarmörk í stöðugri baráttu við að halda þaki yfir sér og sínum og eiga til hnífs og skeiðar. Sem hefur ekki efni á að senda börnin sín í tómstundir utan skóla eins og íþróttir og tónlist. Fólk sem fer ekki til Tene á hverju ári og helgarferð að vetri til.

Vel stætt fólk á ekkert með að stjórna velferðarmálum þjóðarinnar. Það veit ekkert hvernig er að alast upp í fátækt.

Að republikanskir leppalúðar í henni Ameríku séu að setja í lög bann við fóstureyðingu eftir sex vikna meðgöngu er sama gamla tilraunin til að reyna að stjórna konum. Ekkert annað.

Körlum kemur líkami kvenna ekkert við!