Author: Þrasvarður

Veislan

EF kosningar fara fram í haust er ég að hugsa um í fyrsta skipti á ævi minni að mæta ekki á kjörstað.  Ég nenni þessu ekki lengur.  Er ekki til neins lengur að kjósa samkvæmt sannfæringu sinni.  Framsóknaríhaldið mun aftur vinna. Sannið þið til. Helmingur þjóðarinnar er með höfuðin upp í rassgötunum á sér og gleypir allar kosningalygar stjórnarflokkanna.

Píratar ná aldrei fylgi skoðanakannanna vegna ágreinings innan eigin raða.  Fylgi Vinstri – Grænna snýst í kringum Kötu Jakobs.  Samfylkingin er týnd og tröllum gefin. Það trúir því enginn lengur að innganga í Evrópusambandið bjargi neinu hérlendis.  Viðreisn mun fylgja Sjálfstæðisflokknum.  Björt framtíð mun ekki bjóða fram.

Svo þegar túristarnir fatta loksins að hér er ekkert að sjá og hótelin fara á hausinn, þá fyrst komast Píratar, Samfylking og Vinstri – Grænir að til að taka til eftir veisluna.

Menningarnótt

Skrattaðist hálffimm í strætó niður í bæ með mömmu og brósa eins og síld í tunnu. Þrömmuðum niður Hverfisgötu, gegnum Aðalstræti, yfir Austurvöll og í Hljómskálagarðinn þar sem Geiri Sæm var að gaula.  Leiðir skildust skömmu seinna þegar Friðrik Dór fór að væla í hljóðnemann.

Nennti þessu ekki lengur og brunaði með fyrsta vagni frá BSÍ upp á Hlemm þar sem múgur og margmenni biðu bæði eftir leið 2 og 4 sem áttu að fara heim í Hamraborg eftir tæpan hálftíma.  Sætti mig ekki við þetta og splæsti því í leigubíl í staðinn.

Skil ekki þessa áráttu að elta ókeypis strætó kjaftæði.  Kostar ekki nema 420 kr. fyrir fullorðinn einstakling í vagninn aðra daga.  Margföldum það með fjórum einstaklingum og smyrjum aðeins meira ofan á og þú færð svipað út í topp þægindum upp að dyrum með leigubíl. Plús að við notum leigubílana allt of lítið.

Annars var ágætt að renna í gegnum miðbæinn og drekka í sig stemninguna. Sérstaklega af því að ég nennti engan veginn niður eftir.  Er meira fyrir að fara fyrr um daginn og skoða mig um í hliðargötum jafnt sem aðalgötum í rólegheitum. Geri það kannski að ári og næ að skoða Grandagarð í leiðinni.