„Áfengi í matvöruverslanir“ hefur verið frelsisflagg Sjálfstæðisflokksins í áratugi fyrir kosningar. Veifað af nýjum þingmönnum í upphafi hvers kjörtímabils og lofað að leggja fram fyrir þing í lok kjörtímabils. En aldrei hefur neitt gerst. Enda engin alvara að baki.

Svo hefur netverslun tekið við sér með heimafesti í öðrum löndum en lager hérlendis. Einhver dómsmál eru í gangi um réttmæti þess og munu vonandi daga uppi. Á meðan nýtir Jón Gunnarsson dómsmálaráðherra tækifærið og veitir íslenskum framleiðendum loksins þann sjálfsagða rétt að geta selt framleiðslu sína beint frá býli til viðskiptavina sem koma í heimsókn.

Jón Gunnarsson er ekki allra en fær þó prik frá mér fyrir að koma sjálfsögðum málum áfram í stað þess að hjakka í sama farinu og bíða eftir samþykki annarra sem engu þora.

Svolítið skrítið að ekki megi leyfa einhvern hlut vegna þess að eftir á að gera eitthvað annað sem er framar í forgangsröðinni. Með slíkum rökum verður ekkert gert. Aldrei. Sem er án efa það sem margir vilja. Halda öllu óbreyttu í sama djúpa farveginum og leiðindunum.

Ömurlegast er þó að fólk skuli í sífellu falla fyrir lygi Sjálfstæðisflokksins og rísa upp á afturlappirnar í hvert sinn sem þau tala um möguleikan á áfengi í matvöruverslanir. Eitthvað sem verður seint framkvæmt af þeirra frumkvæði, heldur mun gerast af sjálfu sér með aukinni netverslun innanlands og landa á milli.

Hættið að berjast við vindmyllur. Þær munu koma hvort sem þið viljið eða ekki. Þannig hagar framtíðin sér.

Fékk fyrstu jakkafötin fyrir fermingu. Önnur fyrir 25 ára afmælið sem dugðu í nokkur ár á djamminu.

Ætti ég að fá mér þriðju fyrir fimmtugsafmælið? Er hrifnari af stökum jakka og buxum án bindis.

Merkilegt að ég skuli frekar neyta sorps heldur en að leggja smá erfiði á mig við að velja betra hráefni og meiri tíma við að elda betri máltíðir.

Brauð er gott dæmi. Hendi frekar algengasta hvítu eða grófu í körfuna heldur en að velja af kostgæfni. Og dauðsé svo eftir því þegar mig langar í gott brauð með áleggi og osti. Fara í bakarí.

Er reyndar búinn að sætta mig við að geta ekki eldað almennilegan borgara eða pizzu. Pikka því frekar upp hjá Yuzu, Plan B Burger, Natalia eða Castello.

Borða allt of lítið af fiski. Samt er frábær Fiskbúð Fúsa nánast í gönguleið frá vinnunni. Verð að heilsa oftar upp á kallinn.

Letin fær mig til að borða vitlaust. Verð að láta af henni.