Eftir gráan og votan mánudagsmorgun fór að birta aðeins til þegar ég þrammaði heim úr vinnu. Kom við í Krónunni og lenti í úlfatíma dauðans. Allir krakkar grenjandi, rellandi og dauðþreyttir. Var fljótur að koma mér út.

Er ég nálgaðist blokkina mína sá ég aftur þennan gamla mann með sorpið. Karl á áttræðisaldri með sixpensara og rusl í glærum pokum sem hann setti í djúpgámana okkar. Þeir þrír sem ég sá lentu í plastgámnum. Og voru greinilega almennt sorp. Og hann er ekki einu sinni nágranni minn.

Búinn að leggja bílnum sínum í stæði hinum meginn götunnar. Eflaust búinn að dæla fleiri pokum í gámana okkar áður en mig bar að. Ekki nema von að gámarnir fyllist svona fljótt þegar einhver gamalmenni úr öðrum hverfum koma með ruslið sitt. Hvað gengur manninum eiginlega til?

Kunni ekki við að smella mynd af honum og sá ekki númerið á bílnum hans. Sá hann bara setjast inn og fá sér bita af brauðsneið og kaffisopa áður en hann hvarf á braut. Kannski er hann að fela sönnunargögn um glæp.

Gamli maðurinn og glæpurinn.

Straumur tímans hlýfir engum. Framþróun hans heldur áfram óháð skoðunum afturhaldssinna landsins.

Tækniframfarir krefjast annarra viðskiptahátta en hafa tíðkast fram að þessu. Úrelda boð, bönn og ríkisreknar áfengisverslanir.

Netverslunin er að taka yfir eftir Covid. Og þar pantar tæp 20% landsmanna sér áfengar veigar í stað þess að þramma í Vínbúðina eftir dýrari vöru.

Vissulega í gegnum réttaróvissu er varðar erlendar netverslanir með vöruhús stödd hérlendis. Smuga í gegnum þvermóðskulög landsins er varða áfengi.

Án efa mun hið heilaga Alþingi fylla í gatið með lagasetningu í stað þess að bjóða upp á frekara frelsi í málaflokknum með íslenskri netverslun eða áfengi í matvöruverslunum.

Hvernig væri að opna sérverslun ríkisins með sælgæti og aðrar sykurvörur! Sem eru mun hættulegri en bjórsull, léttvín og spíri. Gefa út skírteini sem sykursjúkir fá ekki til að versla þar.

Fokið er í flest skjól þegar Kristján Hreinsson Skerjafjarðarskáld er látinn fara frá Endurmenntun Háskóla Íslands fyrir að tjá sig um transfólk. Liðið sem rak hann hefur án efa ekki einu sinni lesskilning til að að melta texta Kristjáns til fulls. Ekki frekar en ég. Til þess er Kristján of vel gefinn og misskilinn.

Það má nefnilega ekkert lengur. Hvorki tjá sig af hreinskilni né vera þú sjálfur. Góða fólkið tekur það ekki í mál. Það má ekki pissa á bak við skúr. Þú átt bara að halda í þér þar til þú springur og mígur á þig.

Það má til dæmis ekki hafa orð á því að það er ekki lengur hægt að ferðast með vissum leiðum Strætó vegna þess að allir farþegar vagnsins eru með símana sína á hæsta styrk spilandi tónlist frá sínu heimalandi eða í myndsímtölum við ættingja hinum megin á hnettinum með tilheyrandi látum.

Að hafa orð á slíku er víst rasismi…samkvæmt góða fólkinu sem ferðast ekki með strætó.