Öll mín starfsár á vinnumarkaði hef ég unnið í opnum rýmum. Og þau eru loksins að detta í tísku hérlendis einmitt núna með kröfum opinbers- og einkareksturs um minna húsnæði og færri fermetra fyrir hvern starfsmann. Skilrúm í stað veggja. Opnir básar í stað lokaðra skrifstofa.

Verði ykkur að því! Lítið fjör er að starfa í fuglabjargi. Hvað þá við þjóðbraut blaðrandi samstarfsfólks. Eini mögulegi flóttinn eru þráðlaus heyrnatól og endalaus hlaðvörp á netinu. Eða hverfa inn í sjálfan sig og eigin hugsanir. Loka hlustunum.

Verst er þó allt þetta lið sem hangir á öxlunum á þér. Skoðandi hvað þú ert að gera á skrifborðinu og í tölvunni. Eins og því komi það eittvað við.

Opin rými eru þó ekki alvond. Þú losnar við alla hurðaskellina.

Óbreytt ástand styrkir sig í sessi eftir kosningar. Þorri fólks vill víst láta taka sig áfram í ósmurt í fjögur ár í viðbót af íhalds- og afturhaldsþríeykinu. Þrauka önnur fjögur ár af leiðindum, stöðnun, boðum, bönnum og spillingu.

Leyfa frekari einkarekstur (einkavinavæðingu) á bönkum, heilbrigðisþjónustu og velferð. Viðhalda viðbjóðnum í útgerðinni. Ulla áfram framan í aldraða og öryrkja. Stinga stjórnarskrárbreytingum áfram undir stól. Sýna okkur áfram fingurinn.

Þessari þjóð er ekki viðbjargandi! Þorri Íslendinga eru apaheilar sem leitar alltaf aftur til þeirra sem kvelja þá mest. Svo kunnum við hvorki að telja eða að innsigla atkvæði. Og af hverju merkjum við enn X með blýanti sem auðveldlega er hægt að stroka út? Notum bláan penna eins og við aðrar undirskriftir!

Sóttólfur er farinn að ókyrrast yfir öllu þessu andskotans frelsi sem við fáum að njóta og gælir við að skella aftur í lás og slá. Gott ef hann aflýsir ekki bara kosningunum í leiðinni. Allt er mögulegt. Enda fer maðurinn með alræðisvald.

Grímulaust fólk í strætó og Bónus er byrjað að horfa skringilega á mig. Eins og ég sé að gera þeim eitthvað með því að klæðast grímu. Enda kominn í minnihluta. Meira að segja gamla fólkið mætir kokhraust án grímu.

Líður eins og eina edrú gaurnum í teitinu sem er að eyðileggja stemninguna fyrir öllum hinum. Sorry, en mig langar bara ekkert til að smitast af einhverju Delta afbrigði.