Eftir að hafa tekið það í rassinn upp í Glæsibæ og fengið mér borgara á KFC, þá þrammaði ég í gegnum Laugardalinn í trjágöngum framhjá Húsdýragarðinum og grasagarðinum. Áði um stund á steinsteyptum tröppukanti við höfuðstöðvar KSÍ við þjóðarleikvanginn og starði á þýska tæknitrukka sem eiga eflaust að sýna frá landsleiknum á morgun.

Laust niður í huga mér að barátta fólks fyrir að typpamenning KSÍ hverfi á braut með fráfarinni stjórn er draumsýn ein. Sjáið bara allt liðið sem hefur lagt vögnum sínum í kring um KSÍ og heimtað að fótboltinn fái að vera í friði fyrir #metoo. Sami sveitti hópurinn og reis upp á afturfæturna þegar afburðarlið stelpna í körfubolta heimtaði að fá að mæta jafningjum sínum strákameginn.

Ó, nei, bíðið við! Það má ekki svipta drengi sjálfstraustinu með því að tapa fyrir stelpum. Ó, nei, bíðið við! Það má ekki svipta karlaliðin karlmennsku sinni með því að banna þeim að áreita konur og þaðan af verra. Má bara alls ekki segja þeim að þeir eru ekki hálfguðir sem leyfist allt því þeir geta sparkað í boltatuðru.

ÁFRAM ÍSLAND!

Eftir að hafa kyngt þá er stuttur vegur að því að taka það í rassinn. – Nei, ég er ekki að tala um kynlíf.

Eftir magaspeglun fyrir mánuði síðan mætti ég í ristilspeglun í dag. Eins og aldurhnignir menn eiga að gera í kringum fimmtugt. Alls ekki eins mikið mál og ég var búinn að mikla fyrir mér. Sérstaklega ekki ef engir separ eða önnur mein finnast.

Er hinsvegar með Helicobacter pylori bakteríuna eins og meira en þriðjungur fólks. Hún veldur bólgum sem geta leitt til magasárs. Fer á viku lyfjakúr til að fjarlægja hana úr maganum. Bakterían smitast sennilega með drykkjarvatni og svo milli ættliða (móðir/sonur). Bæði móðurafi minn og mamma fengu magasár svo ég er ekki hissa.

Er þrátt fyrir allt bara í nokkuð góðum málum eftir að hafa kyngt og tekið það í rassinn. Næsti viðkomustaður er Grindr….DJÓK. – Farið endilega í tékk. Skaðar ekkert að láta líta undir vélarhlífina öðru hverju. Fyrirbyggja þannig verri útkomu síðar á lífsleiðinni.

Lengi hef ég reynt að berjast gegn leiðindum sóttvarnalæknis. Takmörkunum um hve mörg okkar megum koma saman hverju sinni og skerðingu á opnunartíma veitingastaða. Nenni því ekki lengur. Algjör tímasóun sem breytir engu.

Stemningin virðist vera sú að þessi gaur eigi að fá að og fái að ráða öllu fyrir og eftir kosningar. Alveg sama hvaða flokkar fari með næstu stjórn. Til hvers erum við þá að kjósa? Er lýðræðið ekki dautt þegar embættismenn fá að ráða öllu sama hvað?

Er því hættur að tjá mig um Covid-19 á þessum vettvangi. Og er að hugsa um að hætta að tjá mig algjörlega á netinu. Og spara þannig fullt af tíma sem má nýta í eitthvað uppbyggilegra.

Næsta skref er að loka öllum aðgöngum að wordpress, facebook, twitter og instagram.