http://nutiminn.is/thid-erud-ad-djoggla-med-lif-barnanna-okkar-helvitis-folkid-ykkar/

Fyrirsögnin hér að ofan er um það bil sú flottasta sem ég hef séð lengi á netinu. Segir allt sem segja þarf um hvernig fávitarnir í ríkisstjórninni eru kerfisbundið að brjóta niður heilbrigðiskerfið svo þau geta einkavinavætt það til fyrirtækja eins og Sinnum sem hefur séð um sjúkrahótel með svo glimrandi árangri eða hitt þó heldur.

Græðgin hjá þessu Sjálfstæðisgengi í Garðabænum á sér engin takmörk og er farin að bitna á okkur sem þurfum að leita ásjár okkar frábæra fólks í heilbrigðisgeiranum sem hefur ekki nú þegar flúið til Noregs í betri kjör og mannúðlegri vinnutíma.

Ég játa fávisku mína þegar kemur að viðskiptum, enda bara málastúdent með ókláraða B.A. gráðu í sagnfræði. Skil ekki af hverju þarf að brjóta allt niður svo einkavinir Bjarna Ben. geti byggt upp aftur fyrir margfalda þá hungurlús sem nú er varið til Landsspítalans. Hvernig telst það frjálslyndi og flott viðskipti að sölsa undir sig velferðarkerfi heillar þjóðar? Getið þið ekki bara byrjað með báðar hendur tómar eins og annað fólk í viðskiptum? Af hverju þurfið þið þessa meðgjöf frá ríkinu?

Munu hjúkrunarfræðingar fá eitthvað betur borgað í strípuðu, amerísku heilbrigðiskerfi Engeyinganna þar sem fólk sem veikist neyðist til að borga upp í topp fyrir læknisþjónustu og setja sig á hausinn í ferlinu? Hin sem ekki hafa efni á þjónustunni mega víst bara éta það sem úti frýs og deyja.

Ég greiði glaður skatta fyrir gott heilbrigðiskerfi sem fer ekki í manngreiningarálit eftir efnahag og lit á flokksskírteini. Ég hef engan áhuga á að greiða sömu upphæð eða margfalt hærri í sjóði Sinnum eða álíka fyrirtækja Garðabæjarmafíu Sjálfstæðisflokksins sem nennir ekki að auðgast samkvæmt eigin hugmyndafræði heldur blóðsýgur ríkið í staðinn og kallar það einkarekstur þegar rétta orðið er arðrán og stuldur á skatttekjum.

Ofan á skattana okkar munum við þurfa að greiða annað eins eða meira aukreitis fyrir það eitt að vekja athygli hins einkavinavædda heilbrigðiskerfis á vandamálum okkar. Skil ekki af hverju fólk er svona spennt fyrir þessari auðn velferðar sem silfurskeiðastjórnarflokkana dreymir um á nóttunni.

2015 er að verða 2007 í endursýningu á breiðtjaldi.  Við virðumst öllu hafa gleymt og höldum óhrædd áfram við að byggja ljót og kassalaga hótel í miðbænum innan um lítil, sæt og gömul hús.  Nú skal hver bæjarlækur virkjaður svo kínverskir fjárfestar geti reyst hér álver með aðstoð lífeyrissjóðanna.  Huang Nubo og Grímsstaðir heyra fortíðinni til.  Kínverjar eru allt í einu orðnir okkar bestu vinir.

Er minnið ekki lengra hjá einni þjóð. Erum við búin að gleyma hruninu? Af hverju eru bankarnir þrír aftur byrjaðir að græða á tá og fingri? Á hinum Norðurlöndunum þykir hóflegur gróði við hæfi meðan þeir byggja hægt upp og styðja við þjóðfélagið.  Hérna blóðmjólka bankarnir okkur og skilja eftir sviðna jörð.  Bera enga samfélagsábyrgð.

Næsta hrun er handan hornsins og mun skella á okkur af fullum krafti fyrr en varir því við neitum að læra af reynslunni.  Græðgin mun koma okkur aftur í gröfina og í þetta sinn til frambúðar.  Raunir Grikklands munu verða hljóm eitt í samanburði við fall Íslands á næsta eða þar næsta ári.

Forljótum DV snepli var troðið í gegnum bréfalúguna mína rétt fyrir miðnætti í vikunni. Rétt um það leyti og ég var að festa svefn. Forsætisráðherragerpið á forsíðunni með allskyns fáranleik og fullyrðingar. Nú þarf enginn að fara í grafgötur með að DV er Framsóknarblaðið. Tíminn sálugi endurborinn. Ég mun aldrei gerast áskrifandi.

Vigdís Hauksdóttir enn og aftur ljúgandi í fjölmiðlum og kennandi fyrri stjórn um hvernig er komið fyrir túlkunarsjóði heyrnarlausra. Leit út eins og kátur köttur sem hefur komist í rjóma þegar hún smjattaði lygaþvæluna sína fyrir framan myndavél og hljóðnema RÚV.

Mikið er ég orðinn leiður á Framsóknarfrekjunni. Hvenær munum við losna við þessa óværu? Hvenær getum við aftur um frjáls höfuð strokið? Ég er svo hræddur um að þessir popúlistar muni ná aftur vopnum sínum eftir tvö ár og ná svipuðum árangri og síðast út á útblásin kosningarloforð. Fólk er nefnilega fífl!

Og já! Ég er með ofnæmi fyrir Sigmundi Davíð og Framsóknarflokknum! Mér finnst eins og fjósafasistarnir og íhaldið hafi rænt stjórnartaumunum í síðustu kosningum með loforðum um gull og græna skóga. Allt til þess gert svo þessir helmingaskiptaflokkar gætu sölsað meira undir sig og sína.

Löngu timabært að nýir aðilar fái að reyna sig við stjórnun landsins. Til dæmis Píratar og önnur ný framboð sem munu spretta fram fyrir næstu kosningar. Hvar stendur steypt í stein að fjórflokkurinn (fimmflokkurinn) eigi einkarétt á að stjórna landinu?