Vilhjálmur Árnason og Róbert Marshall tókust á um áfengisfrumvarpið í síðdegisútvarpi Rásar 2 á fimmtudaginn. Eins rökviss og Róbert var á móti þá var aðdáunarvert að hlýða á Vilhjálm koma með öll sín mótrök. Og þau hljómuðu eins og sinfónía í mín eyru.

Einu áhyggjurnar eru verðlagning (græðgi) verslananna. Mun verðið á veigunum hækka upp úr öllu valdi. Þess vegna væri sniðugt að reka Vínbúðirnar samhliða til reynslu og mótvægis að minnsta kosti fyrsta árið.

Sá brot úr múslimaþætti Lóu Pindar á Stöð 2. Einhver skeggjaður kall í kjól (kufli) með hækju rífandi kjaft og talandi á móti hommum og lesbíum var nú ekki alveg að gera málstað þeirra neinn greiða. Svo hékk þessi drumbur í dyrakarminum og stjórnaði því sem dóttir hans var að reyna að koma til skila. Gott þegar svona drottningarviðtöl sýna sannleikann sem átti að fegra í upphafi.

Fyrsti vagn númer tvö frá Hamraborg rennur úr hlaði 06:50. Ég freistast stundum til að taka þann næsta til að njóta þagnarinnar því pólskt fuglabjarg ferðast með þeim fyrri. Þar erum við oft bara tveir innfæddir með sjö frá Póllandi sem ræða saman í belg og biðu. Einn þeirra er sérstaklega málgefinn og tekur ekki einu sinni stund til að draga andann á milli orða. Ég kalla þann fyrsta pólska vagninn. Og er mikið að hugsa um að læra málið svo ég viti hvað þeir eru að segja um mig alla leið niður á Grensás.