Hef haft insúlínpenna hangandi yfir mér síðustu tvo mánuði frá síðasta tékki. Var búinn að sætta mig við að þurfa nota hann þegar ég mætti aftur á deild G3 fyrir sykursjúka á Borgarspítalanum síðastliðinn föstudag.

En þegar vigtin sagði að ég hefði misst heil sjö kíló og langtímasykurinn hafði lækkað umtalsvert, þá var útséð með að ég fengi nokkurn insúlínpenna í jólagjöf. Og ég sem hafði bara hætt að stelast til að borða súkkulaðistykki með hádegismatnum og á kvöldin yfir kassanum.

Aldrei hef ég komist nær því að þurfa að sprauta mig vegna þessa lífsstílssjúkdóms.  Og ég ætla mér að komast eins fjarri því í framtíðinni. Eins og læknirinn sagði, þá get ég alveg haft stjórn á sykrinum ef ég vill það.  Er ekkert fast í hendi að ég eigi að vera feitur til æviloka.

Ég var einu sinni grannur.  Ég mun verða grennri!

Ríkisstjórnin fer ekki í neinar grafgötur með hernað sinn gegn fjölmiðlum sem þeim fellur ekki í geð. Ríkisútvarpið skal hnébeygt til hlýðni eða lagt niður. Framsókn í gegnum Björn Inga Hrafnsson hefur keypt DV. Útgerðin á Morgunblaðið með húð og hári. Þar ritstýrir Davíð Oddsson og reynir af veikum mætti að endurrita söguna. Svona vill framsóknaríhaldið hafa það. Stjórna opinberri umræðu sér í hag.

Mjallhvít og dvergarnir sjö stjórna landinu. Forsætisráðherra og SJÖ aðstoðarmenn! Mega ekki vera færri án þess að allt fari til helvítis. Verð svo pirraður þegar ég horfi á þetta fífl sitja í þingsalnum párandi eitthvert rugl í skrifblokkina sína meðan aðrir mæla málum sínum fylgis. Til hvers er hann þarna? Er bara sóun á rými og tíma þingsins.

Hægristjórn helvítis fagnaði sennilega í gærkvöldi næsta skrefi sínu gegn þjóðinni. Engu líkara en að hún sé að refsa okkur fyrir að hafa leitt vinstri stjórnina til valda eftir hrun. Hærri skattar á matvæli og bækur. Hærri gjöld á sjúkrahúsheimsóknir í gegnum reglugerðir en ekki lög. Hækkað bakdyramegin.

Eins og afnám vörugjalda á raftækjum hafi eitthvað að segja fyrir hinn almenna borgara sem rembist við að ná endum saman. Sá neytandi er ekkert á leiðinni með greiðslukortið sitt í Elko að kaupa nýja þvottavél. Sú gamla verður bara að duga lengur.

Brauðmolakenning Vilhjálms Bjarnasonar fjárfestis og þingmanns fyrir íhaldið er svo bara olía á eld okkar sem sjáum í gegnum skattahækkanir stjórnarinnar og vitum að þeir tæpu sex milljarðar sem ríkið þykist vera að gefa eftir í tekjum munu bara lenda hjá hinum efnameiri.

Samkvæmt kenningu Vilhjálms nöldrara og fyrrverandi Útsvarskeppanda, þá munum við fátæklingarnir njóta afnáms vörugjalda með því að fá að kaupa gömul raftæki hinna efnameiri þegar þeir endurnýja draslið sitt. Eigum að vera þakklát fyrir það. Hef sjaldan orðið vitni að meiri veruleikafirrun hjá nokkrum þingmanni.