Eins frábær uppistandari og grínisti og Robin var, þá var hann vanmetinn sem kararterleikari.  Sá hann fyrst leika mjög sannfærandi skrítinn Rússa í „Moscow on the Hudson“ og slá endanlega í gegn í „Good Morning Vietnam“ sem útvarpsþulurinn Adrian Cronauer.

Vissulega lék hann oft í væmnum fjölskyldumyndum en hvað með það!  Alltaf var skemmtilegt að sjá hann eða heyra í honum í teiknimyndum.  2002 sannaði hann svo um munar að hann gat alveg leikið vafasama karaktera í „One Hour Photo“ og „Insomnia“.

Robin vingaðist við sjálfan Superman; Christopher Reeve í hinum virta Juilliard leiklistarskóla.  Og greiddi alla sjúkrahúsreikninga vinar síns eftir að hann lamaðist frá hálsi og niður.

Robin var frábær gaur en barðist við sína djöfla eins og flest okkar. Þunglyndi sést víst ekki alltaf utan á fólki.  Sýnum nærgætni í návist sálar.

P.S. Myndin hér að ofan er af Clint Eastwood leikstjóra og gaurunum fjórum sem leika og syngja í myndinni.  Tekin af Ann Leibowitz, einum fremsta portrettljósmyndara Bandaríkjanna.

Jersey Boys að flytja „Sherry“.  Skuggalega líkt upprunalega flutningnum hjá Frankie Valli and the Four Seasons.

Nú er bara að skella sér á ræmuna næsta rigningardag.

Veðrið var gott og ég dröslaðist með mömmu í strætó til að fylgjast með gleðigöngunni.  Leið eitt og tvö úr Hamraborg fylltust fljótt.  Tókum því fjarkann niður á Hlemm og skakklöppuðumst þaðan niður í miðbæ.  Nóg pláss í vagninum og ekkert vesen.

Skömmu síðar tóku að birtast fréttir á vefnum að stútfullir vagnar ækju framhjá fullum biðskýlum af fólki.  Kerfið sprakk í kringum tvö.  Og svo aftur seinnipartinn þegar lýðurinn hélt heim á leið.

Sama á eftir að gerast á menningarnótt eftir tvær vikur.  Svona er þetta bara. Erfitt að reikna út fjöldann fyrirfram á þeim sem munu nota almenningssamgöngur.  Eða svo segja þeir hjá Strætó.  Nægir reyndar að fylgjast með veðurspánni og áætla út frá henni.

Annars var þetta fín bæjarferð.  Hittum nokkra ættingja meðan við sátum eins og rónar á bekk á Austurvelli og hvíldum lúin bein.  Nutum sólarinnar þegar hún lét sjá sig.  Komum okkur loks heim þegar stemningin var að verða sveitt og kólna tók í lofti.

Svanurinn hans Páls Óskars stóð upp úr sem atriði göngunnar.  Hafa reyndar oft verið flottari vagnar en í ár en þátttakan var góð og flestir í góðum gír.  Fullu gaurarnir á Arnarhóli voru þó dálítið eins og álfar út úr hól meðan skemmtiatriðin voru á sviðinu.  Sást varla vín á öðru fólki.