Merkilegt mont lögreglunnar í Vestmannaeyjum yfir gæslu sinni í dalnum. Lögðu alla áherslu á fíkniefnaeftirlit og að elta uppi neytendur með smáskammta.  Væri gaman ef áherslan hefði verið að að tryggja öryggi Þjóðhátíðargesta fyrir ofbeldi og nauðgunum.  Svo gamaldags að beina öllum kröftum lögreglunnar í eltingarleik við neytendur ólöglegra efna meðan dalurinn er fullur af krókódílamönnum með höfuðin full af ljótum hugsunum.

Enn sem er hefur ekkert heyrst af nauðgunum í Herjólfsdal.  En sagan segir okkur að slíkar tilkynningar berast ekki fyrr en í vikunni frá hátíðinni.  Og þá bara frá hugrökkustu stúlkunum en dómatölfræðin er ekki beint hvetjandi. Það er nefnilega gott að vera nauðgari á Íslandi. Sönnunarbyrðin er svo þung að fórnarlömbin þurfa helst að mæta með vitni, myndband og stimplað vottorð um glæp með sér á lögreglustöðina. Jafnvel þá er þeim sjálfum kennt um glæpinn vegna klæðnaðar eða ölvunar.

Komið er við fórnarlömb nauðgana eins og dádýr sem verða viðskila við hjörðina og lenda í klóm rándýra. Geta bara sjálfum sér um kennt.  Og nánast er viðurkenndur réttur rándýranna til að ráðast á viðskila einstaklinga og nauðga. Eins og nauðgun sé eitthvers konar náttúrulögmál sem verður ekki breytt.

Fyrr á öldum pössuðu vinnukonur sig á að ganga efri leiðina milli bæja til að minnka líkurnar á að vera nauðgað því karlmenn á förnum vegi voru oftar en ekki komnir með buxurnar niður að ökklum þegar þeir mættu þeim á aðalveginum. Hefur virkilega ekkert breyst síðan þá?

Nennti ekki í druslugönguna í gær þrátt fyrir að hafa ætlað mér það í öll skiptin sem hún hefur verið haldin. Frábært framtak til að skila skömminni þangað sem hún á heima, hjá gerandanum. Drusluskömm (slutshaming) á ekki heima í siðmenntuðum heimi.  Það á enginn rétt á að nauðga stúlku eða strák sem klæðir sig frjálslega (í efnislítil klæði).  Á Íslandi virðist ríkja einhvers konar nauðgana(ó)menning.

Við Íslendingar erum undarlegur söfnuður!  Eipum yfir mosku sem á að hrófla upp í Reykjavík og æpum á torgum úti um yfirvofandi yfirráð múslima í landinu.  Ísraelar bomba Gaza og við Reykásumst algjörlega og förum að vorkenna og halda með Palestínu.  Eitthvað mun nú samúðin minnka þegar flóttafólk frá Gaza biður um að koma til Íslands.  Kristna liðið er þó verst. Heldur virkilega að gyðingdómur og kristni sé sami hluturinn.  Síðan hvenær, spyr ég nú bara?  Voru það ekki gyðingar sem krossfestu Krist? Nei, segi svona.  Ísraelar eru nefnilega svo uppteknir af því að benda á söguna þegar einhver efast um tilvistarrétt Ísraelríkis.