Þegnum þessa lands er treyst til þess að kjósa yfir sig Framsókn en ekki að versla sér vín úr matvörubúðum. Möguleg koma Costco til landsins hefur komið umræðunni aftur í gang.  Rökin fyrir rekstri Vínbúða ríkisins eru þau að þær eru svo flottar, hlaðnar úrvali og mannaðar vínsérfræðingum.  Bull og vitleysa!

Varaformaður Neytendasamtakanna, Þóra Guðmundsdóttir, ver þessi skipti í Sprengisandi, þætti Sigurjóns Egilssonar á Bylgjunni.  Ber fyrir sig lýðheilsusjónarmið sem kunna að koma sumum fyrir sjónir sem forræðishyggja ríkisins.  Kannski vegna þess að þetta ER forræðishyggja!

Sykur flæðir um allt í matvörubúðum landsins.  Og enginn gerir athugasemd við það.  En um leið og að minnst er á bjór eða léttvín, þá verður allt vitlaust. Í flestum siðmenntuðum löndum má selja vín í öllum búðum. En þar eru líka „liquor store“ sem sérhæfa sig í sölu á fínni vínum og hafa þekkingu á þeim. Slíkar verslanir munu einnig þrífast hér þegar við leggjum niður ÁTVR. Færasta starfsfólkið þaðan mun fá vinnu áfram í þessum sérhæfðu verslunum.

 

 

Snjallsíminn minn er búinn að vera.  Er frosinn og getur ekki kveikt á sér. Mér er tjáð að kannski borgi sig ekki að láta laga hann. Hlaut að koma að þessu.  Hverjum datt í hug að hnoða saman spjaldtölvu og farsíma í eina heild! Allt of mikið að gerast í einu tæki.  Er gert til þess að bila.

I’m going back to basics!  Ætla að fá mér einfaldan takkasíma með útvarpi og endingargóðri rafhlöðu.  Enda notaði ég fátt annað í snjallsímanum mínum.  Snjallsímavæðingin er ekki að virka sem skyldi.  Allir þessir möguleikar í einu litlu tæki ganga ekki upp til lengdar.

Sé á netinu að bara ný framhlið á slíka síma kostar frá 15.000 til 25.000 krónur.  Þessi sífellda þörf fyrir nýjustu upplýsingar er að gera út af við okkur!  Slökum aðeins á og bökkum til þess tíma þegar farsímar voru til að tala í og kannski mesta lagi senda smáskilaboð þess á milli.

Mér finnst hundleiðinlegt að taka ljósmyndir með símanum mínum. Stemningin er ekki sú sama og að halda á alvöru myndavél og ráða öllu sjálfur.  Ég gekk með vasadiskó/útvarp á mér fram til 2007 þegar það dó. Ætli þannig græja fáist ennþá?

Jón Sullenberger fagnar mögulegri komu Costco inn á íslenska markaðinn. Það nægir mér að maður sem hefur neyðst til að berjast fyrir lífi sínu gagnvart íslensk/evrópsku regluverki síðustu fjögur árin sé sáttur.  Hann hefur þurft að líma límmiða ofan á límmiða á ameríska vöru sína.  Rétt eins og að þjóðin skilji ekki ritaðar enskar innihaldslýsingar.

Skítt með Evrópusambandið og fríverslunarsamninginn við Kína.  Við eigum auðvitað að opna fyrir sem flestum. Vera háð engum en í sambandi við sem flestar þjóðir.  Viðskiptavinir Costco greiða ríflega sex þúsund krónur á ári til að vera meðlimir og fá í staðinn að versla mun ódýrari vöru.

Heykvíslaliðið hefur áhyggjur af kröfum um undanþágur frá áfengislögum og innflutningi á hráu kjöti.  Costco greiðir hærri laun en íslensk lágmarkslaun. Og er mun betur liðið en Walmart keðjan.  Costco hefur aðlagað sig að lögum og reglum hvers ríkis en þrýstir jafnframt á að fá að selja lausasölulyf, áfengi og eldsneyti yfir borðið á lægra verði.  Rétt eins og allar aðrar vörur sínar.

Framsókn og Vinstri – Grænir munu reyna koma í veg fyrir komu Costco inn í landið.  Verslunarmafían mínus Sullenberger mun aðstoða.  Neytendur mega einfaldlega ekki sjá dagsljós.  Eiga bara að dvelja í myrkri einokun og okri. „Það er svo dýrt að flytja inn vörur því við erum á eyju.“  Mætti halda að við byggjum undir yfirborði jarðarinnar.

Okkar vandamál varðandi verslun er bændamafían og afturhaldssinnar sem vilja enga erlenda samkeppni. Þora einfaldlega ekki að taka þátt í henni. Hin íslenska framleiðsla á að vera sú eina sem við getum neytt.  Annað er eitrað drasl.  Þvílíkt bull og vitleysa!

Er komið nóg af því að smákóngar útgerðar og landbúnaðar skammti okkur verslunarfrelsi og vörur.  Hér gæti verið svo mun betra að búa ef við fengjum að velja og ráða sjálf.  Íslenskir framleiðendur þurfa ekki að örvænta.  Vörur þeirra munu seljast áfram í sama magni.  Enda gæðavara.