Eitthvað á víst að gíra upp kerfi strætó með tíðari ferðum og lengri þjónustu. Spurning um að gefa dætó smá séns áður en ég fer að henda fé í bílkaup.

Samt. Nú þarf að fjölga vögnum með verktökum. Einhverjar druslur lagðar til eins og í den með snarvitlausa bílstjóra sem kunna hvorki íslensku né ensku.

Sjáum til. Óþarfi að mála skrattann á vegginn fyrirfram.

Hef ákveðið að hætta að velta mér upp úr vitleysunni sem appelsínugula fyrirbærið gerir vestan tjarnarinnar. Kemur mér ekki við, get ekkert gert í því og mun líða mun betur ef ég hugsa ekki um þetta versta úrhrak sem gat dunið aftur á annars ágætri þjóð föðurafa míns.

Eins ætla ég að hætta að láta góða fólkið fara í taugarnar á mér. Málstað þeirra þá stundina og hneykslun þeirra á okkur hinum sem nennum ekki að velta okkur upp úr einhverri vitleysu út í heimi sem við getum ekkert gert í til að breyta.

Og að lokum ætla ég að hætta að ferðast með strætó. Fullreynt dæmi. Hangi núna á sölusíðum bílasala. Langar helst í rafbíl. Eða sjálfskiptan. Get ekki lengur notað vinstri fótinn örugglega á kúplinguna. Hefur ekki sama kraft og áreiðanleika og áður.

Margaret Thatcher er sögð hafa sagt að sérhver sem ferðaðist með strætó eftir 25 ára aldurinn hefði mistekist í lífinu.

Eftir því sem ég eldist verð ég henni meira sammála. Af hverju kaupi ég mér ekki bara bíl? Jú, vegna þess að ég þarf sjálfskiptan bíl vegna ónýts vinstri fótar og mig langar helst í rafbíl eftir að hafa prófað slíkt kvikindi.

Þessir bensínhákar eru svo úreltir og beinskiptir og rafbílarnir svo dýrir og sjálfskiptir.