Sorglegir þessir teboðsfulltrúar Sjálfstæðisflokksins sem heimta að Jesú sé í hverri skólastofu borgarinnar.  Síðast þegar ég vissi var trúfrelsi í landinu. Skýtur reyndar skökku við að Þjóðkirkjan sé ríkiskirkja samkvæmt stjórnarskránni.  Passar ekki alveg við trúfrelsið og skoðanafrelsið.

Allt trúboð á að vera bannað í grunn- og framhaldsskólum.  Fáranlegt að leyfa slíkt innan menntastofnana.  Krakkarnir eiga að vera frjáls frá slíkum áróðri. Stjórnmálaflokkar eiga ekki heldur að fá að dreifa eitri sínu yfir nemendur.

Megum heldur ekki vera of auðmjúk gagnvart öðrum trúarbrögðum en kristni. Veita afslátt af gildum okkar til að þóknast þeim.  Eins og þegar Hagaskóli tók svínakjöt af matseðlinum til að styggja ekki þau örfáu múslimabörn sem sóttu skólann. Minnihlutinn á ekki að kúga meirihlutann.

Sjálfsálit stjórnarflokkanna í borginni er fáranlegt.  Telja sig þess umkomna að bjóða fram úrelta gaura á síðasta söludegi og jafnvel vekja upp spillingarpésa sem sat beggja megin borðsins í borgarstjórnartíð Hönnu Birnu.  Trúa því virkilega að trúgirni kjósenda vari fram á næsta vor.

Nei, þolinmæðina þrýtur í næstu viku þegar niðurfellingatillögur stjórnarinnar koma fram og reynast vera hvorki fugl né fiskur.  Eitthvert samsull skattaívilnana og lífeyristengdra afslátta sem koma fáum sem engum til góða nema kannski þeim tekjuhæstu.  Og á endanum lendir kostnaðurinn á skattgreiðendum en ekki kröfuhöfum bankanna.

En vonandi hef ég rangt fyrir mér.  Vonandi koma tillögurnar þeim til góða sem hafa staðið vaktina og greitt samviskusamlega af sínum eignum í gegnum hrunárin í stað þess að láta allt fara til fjandans.  Fólkið sem Sigmundur Davíð kallar millistéttina og hefur enn enga leiðréttingu fengið.

Forsagan vekur þó hjá mér ugg.  Skærur forsætisráðherra við Seðlabankann í síðustu viku og stöðugt tal hans um að stjórnarandstaðan ætli sér að vera á móti tillögum hans segja mér að Sigmundur sé að reyna að byrgja brunninn fyrir fram. Búa til sökudólga til að benda á þegar fólkinu finnst ekki nóg hafa verið gert.

Ummælakerfi dv.is er því miður stundum sorptunna íslenskra skoðana.  En mikið vil ég ekki vera án þess því örsjaldan ná álit mér að skapi þar í gegn. Eins og að ekki eigi að loka burðardýr inni.  Glæpurinn er ekki þeirra heldur óþverranna sem fengu þau til verksins.

Geng jafnvel svo langt að ekki eigi einu sinni að loka óþverrana inni hafi þeir ekki framið ofbeldisglæpi.  Fjármunum samfélagsins er betur varið í heilbrigðis- og velferðarmál en að halda smyglurum og skattsvikurum uppi á Litla-Hrauni í mat og húsnæði.

Merkjum þetta lið og sjáum til þess að þau verða tekin fyrir í öllum tollafgreiðslum heimsins þegar þau ferðast í framtíðinni.  Stríðið gegn eiturlyfjum er löngu tapað. Ríki heimsins eru smá saman að fatta það og beina fjármunum sínum til þarfari mála.

Tilgangslaust að refsa þeim sem flytja inn og selja eiturlyf.  Fíklarnir verða bara að taka ábyrgð á sér sjálfum.  Leita sér hjálpar áður en þeir gefa upp öndina. Aðstandendur vilja eðlilega refsa einhverjum í stað þess að viðurkenna að ættingi þeirra sé eða hafi verið fíkill og aumingi.