Nýjasta nýtt fyrir utan alskegg og slæðu um hálsinn er að þykjast vera alkahólisti í bata.  Hvernig viðkomandi hafi loks fundið sig eftir að áfengið var horfið úr lífi þeirra.  Leiðinlegasta fólk í heimi!

Skil ekki alveg pælinguna með að vera nafnlaus alki á vikulegum fundum AA-samtakanna en baða sig svo í sviðsljósi fjölmiðla þess á milli fyrir að vera loks laus við áfengið.  Undarleg tvöfeldni.

Menn tæpir á bindindinu á föstudögum eru frekar sorglegir.  Einn slíkur stöðvaði bifreið sína fyrir utan vinnustað minn þar sem tvær samstarfskonur mínar stóðu og hreytti út úr sér að þær ættu að halda áfram að vinna í stað þess að hanga þarna og reykja.  Hann greiddi sína skatta og vildi að þeim væri betur varið.

Gildir einu hvort þær voru að reykja eða fá sér ferskt loft.  Kom honum ekkert við.    Önnur þeirra lét ekki bjóða sér svona dónaskap og svaraði karldurginum fullum hálsi þar til hann gafst upp og brunaði í burtu.  Frekjan í sumu fólki.

Merkilegt þegar svona kurfar hella sér yfir fólk.  Rétt missti af því um árið þegar geðbilaður gaur með barnið sitt ætlaði að hjóla í mömmu í bílageymslunni undir Smáratorgi fyrir að standa út í horni og njóta reyksins með sjálfri sér. Gaurinn froðufelldi af bræði og gerði sig líklegan til að leggja hendur á gömlu þegar hún vogaði sér að svara honum.

Sé enn eftir að hafa ekki látið karldurginn sem hellti sér yfir afgreiðsludrenginn í Nettó heyra það.  Greyið vann sér það eitt til saka að biðja um greiðslu fyrir vörurnar þegar karluglan raðaði pollrólega í pokana meðan röðin lengdist við kassann.

Fáranlegt að lífsleiðar leiðindaskjóður komist sífellt upp með slíka frekju og yfirgang.  Svona hegðun á ekki að líðast.  Við eigum ekki að þegja meðan risaeðlur láta öllum illum látum, heldur gefa þeim duglegt spark í afturendann.

Nenni ekki lengur að pirra mig á ráðamönnum þjóðarinnar.  Þessu hyski sem hinn helmingur þjóðarinnar hefur kosið yfir sig.  Sama Framsóknarlið kaus Ólaf Ragnar sem forseta í fyrra.  Gott ef Guðni konur-eiga-heima-bak-við-eldavél Ágústsson hafi ekki séð til þess.

Framsóknarmafían er veruleikafirrt og velur sér sinn sannleika hverju sinni. Nú er Evrópu allt í einu engin alvara með að samþykkja umsókn okkar samkvæmt forsetafíflinu.  Og þjóðin vill ekki kjósa um hvort eigi að halda áfram umsóknarferlinu að ESB að mati Sigurðar Inga sveitamanns.

Mikið er gott að eiga alvitra leiðtoga!  Forðar mér frá því að þurfa að hugsa sjálfstætt.  Meðan þessir tveir snillingar einblína á Grikkland þá horfum við hinn helmingurinn til Danmerkur, Svíþjóðar, Þýskalands og Frakklands.

Ömurlegt að fámenn klíka kvótabaróna og bænda skuli leyfast að halda heilli þjóð í heljargreipum vegna þess að þeir þora ekki í smá samkeppni við heiminn í kringum okkur.

Af hverju neyðumst við til að greiða hærra verð fyrir allar vörur vegna ótta og minnimáttarkenndar nokkurra íhaldsmanna og fjósafasista? – Vegna þess að við erum vitleysingar sem kjósum sífellt yfir okkur enn meiri vitleysinga til að stjórna landinu.