Nú er orðið ljóst að stjórnarandstaðan ætlar að halda uppi málþófi í kringum stjórnarskrármálið.  Tylliástæða til að lama þingið.  Okkur lýðnum er fyrir löngu orðið ljóst að þingheimur mun aldrei samþykkja tillögur stjórnlagaráðs.  Þrátt fyrir að þjóðin hafi skipað honum með þjóðaratkvæðagreiðslu að gera svo.

Og þar sem er vitað að þingheimur hlýðir ekki þjóðarvilja, þá er kosning um inngöngu í ESB tómt mál.  Við vitum að engu skiptir hvernig þjóðin kýs. Þingið og /eða ríkisstjórnin mun snúa niðurstöðunni sér í hag.

Einhvern tíma hefði ég kosið formann Samfylkingarinnar.  Ekki lengur.  Er nokkuð sama hvor þeirra taki við af Jóhönnu af Örk.  Í illgirni minni vil ég samt að Árni Páll hafi sigur.

Guðbjartur er búinn að svíkja svo illilega öryrkja, eldri borgara og atvinnulausa.  Og hjúkrunarfræðinga með dæmalausri hækkun á forstjóra spítalanna.  Fari hann og veri.

Ég treysti varlega mönnum sem dreypa aldrei á áfengi.  Þeir hafa einhverja aðra og verri mannlega bresti.  Eitthvað ljótt að fela.

Við Íslendingar erum vertíðarþjóð.  Tökum allt í skorpum og með áhlaupum. Nú er komið að barnaníðingunum.  Eða bara meintum níðingum. Heykvíslarnar og kyndlarnir eru komin á loft.

Sölvi með Málið náði tveimur í síðasta þætti.  Þeir voru í yfirheyrslum í gær en sleppt að þeim loknum.  Sá yngri er alveg örugglega búinn að missa vinnuna óháð sekt.

Hef aldrei skilið þessa áráttu lögreglunnar að handtaka grunaða menn fyrir framan vinnufélaga og draga þá út í járnum.  Nægir ekki að þeir fái frí og mæti af sjálfsdáðum.  Að þeir sinni boði lögreglunnar.

Af hverju er þessi niðurlæging nauðsynleg?  Þú ert saklaus uns sekt er sönnuð.  Hvorki lögreglan né dómsyfirvöld eru óskeikul.  Sýnum aðeins meiri nærgætni og fagmennsku.  Grunaðir barnaníðingar eiga jafnvel slíkt skilið.

Merkilegast finnst mér að þessir tveir sem Sölvi náði eru báðir giftir og feður. Annar orðinn afi.  Svo er alltaf verið að fetta fingur út í einstæðinga eins og mig.  Að níðingar séu helst barnlausir og án maka.  Bull og vitleysa!!!