Eyþór Ingi á líf og fer til Malmö í maí.  Öllum að óvörum atti Solla stirða við hann í stað Birgittu.  Blessuð farsímabörnin voru ekki farin að sofa minnug Latabæjar.  Þau mundu hinsvegar ekki eftir Birgittu.  Voru ekki fædd þegar hún var í Írafár.

Við Íslendingar tökum Júróvisjón alvarlega.  Hér dugir ekkert hálfkák.  Eyþór Ingi er þó vel að sigrinum kominn.  Lögin sjö voru svona jafn leiðinleg og léleg.  Röddin tryggði honum sigurinn.  Við gerum eitthvað gott úr því en sigrum seint í Svíþjóð.

Langur og dimmur janúar að baki.  Hélt að honum myndi aldrei ljúka. Icesave sennilega búið og allt á uppleið samkvæmt ríkisstjórninni.  Vúppí dú!!!  Dreymdi að Árni Páll mun vinna formanninn.  Varla verri martröð en Guðbjartur gufa.

Þjóðin skiptist í „I told you so“ og samningamenn sem segjast enn hafa rétt fyrir sér.  Öll höfum við unnið.  Enginn hefur tapað.  Verstir eru þó þeir sem kannast ekki við að hafa kosið JÁ og eru að slá sér upp með okkur meirihlutanum sem sögðum NEI.  Geta ekki staðið með sannfæringu sinni. Þola ekki að tapa.

Júróvisjónlagið valið á morgun. Vínbúðir munu fyllast og grill dregin undan vetrardúkum. Gott ef sólin mun ekki skína.  Kominn tími til að fagna eftir drungalega ársbyrjun.  Sparka árinu almennilega í gang.

Íslendingar eru fíklar upp til hópa.  Sést best á könnunum um hvað fólk ætlar að kjósa í vor.  Meira en helmingur ætlar að kjósa hrunflokkana yfir sig vegna þess að núverandi stjórn leyfði þeim ekki að eyða nóg út á reikning.

Allir búnir að gleyma hverjir komu okkur á vonarvöl.  Allt fyrirgefið.  Áfram með smjörið!  Siglum hraðbyri í næsta hrun.  Íslenskri þjóð er ekki viðbjargandi.