Stundum held ég að íslenskri þjóð sé ekki viðbjargandi.  Enn myndu rúmlega þrjátíu prósent kjósa Sjálfstæðisflokkinn ef kosið yrði núna.  Hvað er að ykkur!?  Eruð þið með Alzheimer á háu stigi? Eða svo blinduð af frjálslyndislyginni. Það er enginn frjálslyndur flokkur á Íslandi!

Áður en að hrunflokkarnir komast aftur að kjötkötlunum þarf að tryggja með lögum að fjárfestingar og almenn út- og innlánastarfssemi séu ekki í sama bankanum.  Þarna verður að skilja á milli.  Og ekkert röfl um flókið samspil fjármála bla, bla, bla.

Annars erum við dæmd til að endurtaka hrunið innan fárra ára.

Veit ekki hvort sú fáviska tíðkast ennþá að launþegi verði að halda launaleynd svo hann/hún fái nú örugglega ekki sanngjörn laun fyrir vinnuframlag sitt.  Hef verið svo lengi frá vinnu svo ég veit ekki.

Veit þó að fljótlega eftir hrunið urðu raddir háværar á móti slíku leynimakki.  Allt átti að vera uppi á borðum.  Af hverju má ég ekki segja öðrum hve mikið (lítið) ég hef í laun og þannig bera mig saman við samstarfsfólk?

Persónulega lít ég á kröfu hvers nýs vinnuveitenda um launaleynd sem hótun um uppsögn í upphafi starfs.  Klaufaleg byrjun á samskiptum sem ættu annars að vera eins og opin bók.  Þeir sem krefjast launaleyndar skammast sín fyrir taxtana sína.

Er orðinn enn forhertari í því að fara aldrei aftur einn og óvopnaður niður í miðbæ um helgarnætur.  Einhverjir þrír aumingjar tóku sig til og réðust á náunga fyrir að fara á salernið á barnum Faktory.

Sök fórnarlambsins var að hafa farið í kynleiðréttingu.  Hafði fæðst kona í röngum líkama og skipt um kyn.  Slíkt má ekki.  Það dregur úr karlmennsku okkar hinna sem fæddumst karlar.  Ekki satt?

Eftir barsmíðarnar skreið gaurinn upp í leigubíl til þess eins að fá það framan í sig frá bílstjóranum að transgender væri geðveiki.  Eða svo segir mamma leigarans sem býr í Svíþjóð.  Og hún er „sérfræðingur“.

Sennilega snerust barsmíðarnar ekkert endilega um leiðrétt kyn fórnarlambsins.  Það var bara góð afsökun til að ráðast á hann.  Ætli það hafi ekki spilað meira inn í að hann var einn á ferð.

Svona ofbeldismenn eiga bágt og þjást af minnimáttarkennd vegna einhvers úr æsku eða eru kannski bara fæddir svona.  Fara ekki í bæinn til að skemmta sér heldur til að berja fólk.  Og telja eflaust ekki heldur eftir sér að hópnauðga konum á heimleið úr bænum.

Kannski er aprílgabbið um herskáa femínista ekki svo galin.  Hópur hraustra valkyrja sem rífur eistun undan vesalingum sem herja á konur og kynskiptinga.  Ég myndi kaupa happdrættismiða frá þeim.