Sit hérna og læt mér leiðast yfir endursýningu á Silfri Egils.  Þvílík andskotans leiðindi.  Væri hægt að svæfa naut með rausinu sem lekur úr liðinu sem er boðið í þáttinn.  Og alltaf sömu smettin.  Í útvarpið með þessi leiðindi.  Sóun á filmu.

Þá er nú Kiljan skárri.  Að minnsta kosti skemmtilegri fastagestir þar og umræðuefnið áhugaverðara.  Hlýtur að vera hægt að röfla um fleira í Silfrinu en ruglið sem fávitarnir niður á þingi eru að klúðra.  Var einu sinni gaman að horfa á sunnudögum.  Kannski var ég bara svona fullur þá?

Ung hjón eru búin að opna litla hornbúð í Skerjafirðinum í gömlum pylsukofa.  Selja þar helstu nauðsynjar auk þess að vera með grill og pylsupott.  Snilldin ein á þessum síðustu og verstu þegar eldsneytisverð hækkar og hækkar með degi hverjum.

Getur margborgað sig að rölta út í hverfissjoppu sem þessa eftir mjólkurpotti eða rjóma ofan á pönnslurnar, heldur en að bruna á fjölskyldudrekanum í næsta hverfi fyrir hundruðir eða þúsundir króna.  Jafnvel þó aðeins sé smurt ofan á vöruverðið.

Kannski að gömlu hverfisverslanirnar fari að skjóta aftur upp kollinum með síhækkandi verði á olíu?  Hefur enginn lengur efni á því að hreyfa bílinn fyrir eitthvert smáræði sem gleymdist í stórmarkaðnum á leiðinni heim úr vinnu.

Forsala á Þjóðhátíð hófst í dag.  Uppselt er orðið nú þegar í margar ferðir með Gubbólfi enda keypti Þjóðhátíðarnefnd fullt af ferðum fyrirfram til að selja á dalurinn.is.  Þar er einnig boðið upp á svefnpokapláss.  Bæði kynskipt og fyrir pör í kúlutjaldi.

Rúmir fjórir mánuðir eru til stefnu og fólk flykkist til að festa sér miða og far.  Svona seint í löngum mars á unga fólkið varla mikið af seðlum í veskinu svo smálánafyrirtækin fimm fá nóg af viðskiptum.  Af hverju gat forsalan ekki hafist í byrjun apríl.  Er hérna um eitthvert óopinbert samstarf að ræða?

Að vísu gott og blessað að hægt sé að plana langt fram í tímann á netinu.  Þá er líka hægt að spara sér hátt í fimm þúsund krónur af miðaverði; 13.900 kr. í forsölu í stað 18.900 við hliðið.  Sunnudagurinn er reyndar ekki kominn í sölu enn þá.  Spurning hvað hann mun kosta.