Hef aldrei skilið menn sem bölsótast út í samkynhneigða með Biblíuna að vopni.  Hafa þeir virkilega ekkert skárra að gera.  Hvað eru þeir að bögga ástfangið fólk af sama kyni?  Er öfund í gangi?

Lífið er nógu flókið fyrir.  Flækjur þvælast bara fyrir.  Lífið er best einfalt.

Þess vegna skil ég ekki þrautseigju homma- og lesbíuhatara.  Þetta kemur þeim ekkert við.  Get your own simple life and enjoy it!  Látið aðra í friði.

Heyrði útundan mér að til sölu væru g-strengir og fyllt brjóstarhöld fyrir stelpur niður í allt að átta ára gamlar.  Og það í Hagkaupum.  Væri þar verið að bregðast við eftirspurn mæðra sem sjálfar klæðast slíkum múnderingum dætrum sínum til eftirbreytni.

Rosalega er heimurinn orðinn sjúkur.  Mega börn ekki lengur vera börn.  Þarf að kynja þau upp strax og þau hefja nám í grunnskóla?  Hvað er næst.  Punghlífar fyrir drengina svo þeir sýnast vera vel vaxnir niður?

Skammist ykkar foreldrar!  Ykkur væri nær að innræta krílunum ykkar sjálfstraust og sjálfstæða hugsun heldur en að klæða þau upp eins og klámmyndastjörnur.

Hef aldrei verið neinn risi.  Rétt undir einum og áttatíu og bara nokkuð sáttur með það.  Slepp vonandi þannig við bakverkina sem framhaldsskólaslánar samtímans munu þjást af seinna meir í lífi sínu.

Stóð við hliðina á nokkrum þeirra um daginn á biðstöð eftir strætó.  Þetta eru vansköpuð kvikindi.  Ekkert nema langar lappir og hendur á horuðum búk.  Þá vil ég nú frekar vera þrekinn og samsvara mér.  Sem ég myndi gera ef ég væri ekki orðinn svona helvíti feitur.

Gruna að okkur hafi ekki verið ætlað að verða slánavaxin.  Eitthvað hefur breyst.  Vissulega mataræðið en eflaust líka vinnuuppeldið.  Þessi krakkakvikindi erfiða ekkert lengur.  Má ekkert reyna á þau án þess að fá kæru.  Þau fá flest bómullarhnoðra til að búa í fram á fullorðinsár.  Svo tekur örorkan við.

Háskólakennarar kvarta réttilega yfir tilætlunarsemi stúdenta sem heimta tilbúnar glærur á tölvuformi fyrir tímana. Þau nenna ekki að leggja á sig að taka niður glósur.  Því þá neyðast þau til að mæta í tíma.  Slíkt gæti truflað þau við að sofa fram eftir og lengjast enn frekar fram yfir rúmgaflinn.