Í gær var góður dagur og ég fór að hugsa um þakklæti og karma þegar ég slæddist inn í Vínbúðina við Dalveg þar sem strákur stóð og seldi happdrættismiða fyrir Samhjálp.  Á leið minni inn hunsaði ég hann rétt eins og allt hitt fólkið gerði.

Eftir kaup á syndasafanum gekk ég til hans og renndi kortinu í gegnum posann hans. Ekki eins og maður þurfi að ganga með seðla á sér til að styrkja þennan góða málstað. Að rétta tvo þúsundkalla til Samhjálpar þarfnast engrar íhugunar eða yfirlegu.  Mér leið svo miklu betur á eftir.  Sælla er að gefa en að þiggja!

Eftir fjögurra ára langtímaatvinnuleysi kann ég ekki að eyða peningum. Jafnvel þó ég hafi veskið fullt af seðlum.  Þrátt fyrir bráðum tveggja ára starf hjá Þjóðskjalasafni Íslands þá finn ég ekki enn fyrir svo mikilli öryggistilfinningu að ég galopni veskið og fari að dreifa seðlum í allar áttir.

Atvinnuleysið skemmdi mig að vissu leyti.  En bætti að öðru leyti.  Ég fæ ekki greiðslukortið aftur sem bankinn hrifsaði af mér í kjölfar hrunsins. Og þurfti nýlega að gráta út fyrirfram greitt greiðslukort í þremur tilraunum frá bankanum mínum.

Sem er gott því að ég kunni ekkert með peninga að fara fyrir hrun.  Og kann enn síður að fara með þá núna að því leyti að ég þori ekki að eyða neinu. Atvinnuleysið bíður sífellt við næsta horn.  Ég velti hverri krónu fyrir mér.

Sem er ágætt því ég mun aldrei aftur líta á ráðningu sem æviráðningu. Munurinn á milli reynslutíma og fastráðningar eru tveir mánuðir í uppsagnarfresti. Það er allt og sumt.  Enginn er öruggur með neitt.  Hollt að læra það sem fyrst.  Margt getur breyst á stuttum tíma.

Íslenskt fulltrúalýðræði er ömurlegt!  Ég heimta BEINT lýðræði í gegnum netið! Hvernig má það vera að ein nefnd getur svæft mál sem talið er geta komist í gegnum þingið á meirihluta?  Þetta er fasismi!

Einhver kommabelja í ónefndri nefnd hrósar sigri í fjölmiðlum því afturhaldsamur meirihluti hennar sé á móti því að sala á áfengi verði gefin frjáls.  Því muni frumvarpið deyja þar og aldrei koma til kasta þingsins.  Lengi lifi lýðræðið!

Af hverju erum við að kjósa Þegar ástandið er slíkt að þingmenn berja sér á brjóst fyrir að koma í veg fyrir lýðræðislegar kosningar um mál innan þingsins? Bara vegna þess að þeir (lesist: hún) eru kommar frá Helvíti sem eru á móti öllum þjóðþrifamálum.

Ég er hættur að kjósa!  Það er algjörlega tilgangslaust!  Breytir engu þó frjálslyndir flokkar séu við stjórn.  Hagsmunir þröngsýnna ráða ætíð för í gegnum nefndarstörf.