Hef reynt að fara eftir skipunum lækna og hjúkrunarfræðinga síðustu þrjá mánuði að stíga ekki í vinstri fótinn. Stundum erfitt fyrir mann í yfirvigt án stórra byssa (upphandleggsvöðva). Verð greinilega að fara að rífa í lóðin til að geta ráðið almennilega við hækjurnar.

Hundleiðinlegt að geta ekki skroppið út í búð eftir pela af rjóma og krukku af sultu fyrir pönnukökurnar. Þurfa að panta allt á netinu með góðum fyrirvara. Er að minnsta kosti orðinn fullfær neytandi innlendrar vefverslunar. Og erlendrar. Með Indó kortinu mínu sem er snilld.

Get að vísu skroppið út og ætti að gera það fyrir hreyfingu og geðheilsu. En þori því ekki lengur eftir að erlendir ferðamenn stöðvuðu mig síðast fyrir myndatöku. Höfðu aldrei séð jafn feitan mann á hnéhjóli áður…eða eitthvað. Var eins og eitthvert sirkusdýr.

Var synjað um akstursþjónustu. Er víst ekki nógu fatlaður eða bar mig ekki nógu aumlega. Auðveldast væri að kaupa sjálfskiptan bíl ef eitthvert væri stæðið heima og ef ég ætti milljónir í banka. Aðeins hálft stæði á íbúð takk fyrir og fatlaða stæðið er upptekið. Stefna stjórnvalda í Reykjavík sem búa flest í 101 í göngufæri við nærliggjandi þjónustu. Úthverfin mega éta skít.

Játa fúslega að hafa farið ansi langt niður á tímabili og jafnvel gælt við að kveðja þessa vesælu veröld. Allt hefur verið á móti mér. Ónýtur vinstri fótur og ónýtt vinstra auga. Fékk þó fljótt viðtal hjá augnlækni í gegnum klíkuskap og fór í fyrstu sprautuna af þremur til að fjarlægja bjúg á vinstra auga fimmtudaginn síðastliðinn. Og hitastig vinstri fótarins fer lækkandi. Þolinmæði þrautir allar vinnur.

Skammast mín hinsvegar fyrir að geta ekki verið til staðar fyrir aldraða móður mína og fært henni linsoðin svartsfuglsegg. Gengið frá heimilinu hennar og komið henni í skjól inn á hjúkrunarheimili. Skammast mín fyrir að geta ekki mætt til vinnu með strætó.

Ég var ekki alinn upp til að vera aumingi og byrði á samfélaginu. En sætti mig við það tímabundið upp á þá veiku von um geta gengið aftur í nánustu framtíð. Og sinnt vinnu án þess að vera upp á aðra kominn.

Mikið er ég feginn að þurfa ekki að mæta á kjörstað næsta laugardag vegna tímabundinnar fötlunar. Er ekki að fara að splæsa í leigara upp á samtals 6.000 kr. báðar leiðir til að krossa við einhvern frambjóðanda. Og get ekki séð að boðið sé upp á akstur á kjörstað af nokkru framboði. Svo ég sit bara heima sáttur.

Enda er mér svo drullu sama hver verður forseti á eftir Guðna Th. Jóhannessyni. Verst að hann nennti ekki fjórum árum í viðbót. En ég skil hann vel. Lífið verður að halda áfram. Gnarrinn hefði alveg dugað mér næstu fjögur árin meðan þjóðin væri að draga hausinn úr rassinum á sér. Eða Steinunn Ólína sem nýtur allt of lítils fylgis.

Seint hefði ég trúað því að Katrín yrði frambjóðandi valdastéttarinnar. Og þó. Er nú einu sinni Thoroddssen í móðurættina. Hlébarðar skipta ekki um mynstur. Fjölskyldurnar fjórtán sjá um sig og sína. Vinstri, hægri og miðja skipta litlu undir slíku ljósi.

Á meðan elta sauðirnir fallegt bros og heillandi persónuleika inn í kjörklefann. Ekki ég! Mun sitja heima og horfa á Bessastaði brenna næstkomandi laugardag. Forsetaembættið er gamaldags og má alveg við því að vera lagt niður eftir að Guðni hættir.

Hagkaup ætlar loks að hoppa á vagninn óstöðvandi í átt að eðlilegu aðgengi að áfengi í gegnum vefverslun með sönnun á aldri með Auðkenni og framvísun skilríkja þegar viðkomandi sækir vöruna einhvers staðar á bak við fjarri augum barna og einstaklinga veikum fyrir víni. Rétt eins og Costco hefur gert mánuðum saman.

En það er ekki nóg. Allur bannkórinn er risinn upp á afturlappirnar öskrandi: „hvað með börnin?“, „ÁTVR er nóg“, „lögbrot“ og „stærsta lýðheilsuslys Íslands“. Síðasta fullyrðingin kemur frá leiðinlegasta manni landsins sem kærði sjálfan sig fyrir kaup á bjór á netinu til lögreglunnar. Veit ekki til þess að slíkt sé einfaldlega hægt eða gangi upp innan dómskerfisins. Getur játað glæp en varla kært sjálfan sig. Verður ekki saksóknari að gera slíkt fyrir hans hönd?

Sjálfstæðisflokknum er drullusama um einkaleyfi ÁTVR eða netsölu erlendra síðna hérlendis. Nema kannski brennivínsbarninu úr Grindavík hvers nafn ég man ekki. En það hlustar enginn á hann. Jón Gunnarsson má eiga að hafa leyft innlendum framleiðendum að selja sína vöru frá býli í stað þess að drösla bjórnum í gegnum bákn ÁTVR. Eðlileg ósk sem hann varð auðvitað við.

Og núverandi dómsmálaráðherra er sama sinnis. Sala á áfengum drykkjum úr ríkisreknum sjoppum víðsvegar um landið er löngu úrelt fyrirkomulag. Skilst reyndar að þar sé líka hægt að versla í gegnum netið og sækja í tiltekna verslun – rétt eins og Hagkaup ætlar að gera.

Þá hefst söngurinn um forvarnarstefnu og aðgengi. Sem eru hvort tveggja bull og þvæla. Fyrir þyrsta eru þessi tvö atriði lítið að þvælast fyrir nema á sunnudögum. Hinir allra hörðustu bruna bara á hádegisbarinn og eyða hýrunni þar á margföldu verði. Þeir skynsömu geta núna kíkt á netið og pantað heim á innan við 60 – 90 mínútna án þess að hreyfa sig úr sófanum.

Þvermóðska og frekja þeirra sem telja sig betur gerð til að segja okkur hinum hvernig við eigum að lifa lífinu jaðrar við fasisma. Samband þjóðarinnar við áfengi var lengi erfitt framan af. Vegna verslunarhafta og leiðinda bindindispostula. Allt þar til bjórinn var leyfður, utanlandsferðir urðu algengari og fólk fór að neyta áfengis í hófi í góðra vina hópi yfir máltíð með rautt, hvítt og bjór á kantinum á siðmenntaðan hátt.

Lög eru ekki meitluð í stein til eilífðarnóns. Þau úreldast með tímanum og gleymast stundum í bálkum öldum saman án þess að vera afnumin eða að hafa nokkuð að segja um daglegt líf fólks. Rétt eins og megnið af Biblíunni sem fáir fylgja á þessum kletti nema ferkantaðir, miðaldra gaurar sem iða í skinninu yfir að fá að stjórna öðrum með hverju meðali sem þeir geta gripið til.

Heimurinn er orðinn að einu markaðssvæði með tilkomu netsins. Og enn frekar eftir Covid-19 sem þróaði vefverslunina áfram og kenndi okkur að við getum pantað fleira heim en pizzur og kínverskan mat án nokkurra vankvæða. Flestar verslanir nú til dags eru líka með vefverslun þar sem þú getur pantað heim vörur. Flestar nema ÁTVR sem neitar að horfast í augu við breytta heimsmynd og mun því úreldast sjálfkrafa.

ÁTVR opnar bara útibú við verslunarmiðstöðvar með hundruðir bílastæða. Lokuðu mínu útibúi í Borgartúni skömmu eftir að ég flutti í hverfið og ætla sér ekkert að koma hingað aftur. Þar kom að vísu Krónan sem sárabót. Laugardalurinn er afskiptur á svo margan máta. En það er efni í annan pistil.

Ykkur að segja þá þakka ég fyrir netsölu á áfengi þá þrjá mánuði sem ég hef hangið heima í veikindaleyfi frá vinnu. Annars hefði ég ekki fengið neinn Bola þegar kverkarnar voru þurrar. Heimkaup eru með besta dílinn á Bola og framúrskarandi þjónustu. Vona innilega að Hagkaup gíri upp heimsendingarþjónustu sína í takt við Heimkaup og Nettó.