Ísland er búið þvermóðskufullu fólki sem skítur frekar standandi heldur en að auðvelda sér lífið og setjast á hækjur sér.  Gerum okkur oft lífið erfiðara en þarf að vera.

Greiðum frekar himinháa vexti af öllum lánum heldur en að ganga inn í Evrópusambandið og taka upp Evru.  Okkur finnst svo gaman að halda útgerðinni uppi.  Sennilega vegna þess að hún er svo gjafmild í okkar garð.

Sættum okkur við einhæft framboð af landbúnaðarafurðum og mjólk því bændaforystan vill það þannig.  Samkeppni á því sviði er miskunarlaust drepin niður. Tvö sjálfstæð fyrirtæki á sviði mjólkuriðnaðar ströggla þó enn þrátt fyrir grímulausar tilraunir Mjólkursamsölunnar til að slátra þeim.

Kaupum glöð dýrasta áfengi á byggðu bóli úr þar til gerðum búðum því einhver siðapostuli vill hafa það þannig.  Eigum að skammast okkar á bæði sál og í veski fyrir að drekka görótta drykki.  Mætti halda að við værum mormónar.

Kjósum aftur yfir okkur hrunflokkana sem komu okkur næstum á vonarvöl því okkur fannst vinstristjórnin ekki vinna nógu hratt.  Árangurinn er augljós.  Annað hrun er framundan því stjórnarflokkarnir eru svo uppteknir við að skipta á milli sín góssinu og selja landið til Kínverja.  Hvenær lærum við!

Röflum úti í eldhúshornum þegar einhver vara hækkar í verði.  Förum svo út og kaupum hana.  Erum svo samstöðulaus og einskorðuð við eiginn rass að ekkert verður úr mótmælum okkar.  Búsáhaldabyltingin er undantekningin sem sannar regluna.

Væri blóðið í okkur ekki undir frostmarki myndum við fara með vopnum gegn auðrónunum sem arðrændu okkur.  Draga þá út úr illa fengnum höllunum sínum og hengja þá upp í hæstu tré.  Vinda ránsfenginn úr þeim.  Senda þá svo í útlegð til Tortola.

Í stað þess að auðvelda okkur lífið kjósum við frekar grýttari veginn í einhverri óútskýrði þrjósku og stolti.  Merkilegt!

Lítur ekki út fyrir að smánarsamningar ASÍ og SA verði samþykktir af öllu félagsfólki verkalýðsfélaganna svo ríkisstjórnin réttir út rýrt bein í formi loforðs um að hætta við einhverjar gjaldsskrárshækkanir…en aðeins ef samningarnir verða samþykktir.

Fimm mínútum seinna varpar Bjarni Ben. fjármálaráðherra sprengju.  Kjaftar frá áformum sínum um að hækka og lækka virðisauka á matvöru.  Hækka lægra þrepið og lækka hið efra.  Eitthvað sem mun hækka matvöruverð í landinu.

En Bjarna er drullusama.  Honum finnst bara fáranlegt að fátæklingurinn fái einhverja meðgjöf í lífinu, blessaður silfurskeiðingurinn.

Tveggja vikna handboltaleiðindi hefjast í dag á RÚV.  Ekki að dagsskráin versni mikið fyrir vikið.  Bláköld þjóðremban mun vella út um skjáinn ásamt afsökunum og gráti yfir slæmu gengi liðsins.  Silfurdrengirnir frá Peking 2008 eru svipur hjá sjón.  Erum ekki lengur „stórasta“ land í heimi.

Íslendingar eru sennilega eina þjóðin á hnettinum sem heldur upp á annað sætið. Hjá öðrum þjóðum er annað sætið ekki til.  Svona álíka og að halda upp á að fótboltalandsliðið hafi næstum því komist til Brasilíu.  Fáranlegt!  There is no second place.