Skilgreining á aumingjum:  Mannleysur sem leigja stærstu ýtu landssins til að ryðjast yfir sögufrægt Gálgahraun svo náttúruverndarsinnar hafi ekkert til að berjast fyrir lengur.

Skilgreining á aumingjum:  Bæjarstjóri Garðabæjar, forstjóri Vegagerðarinnar og verktakavinir þeirra úr flokknum sem panta lögreglusveit upp á fimm tugi til að verja siðlausar framkvæmdir og handtaka mótmælendur.  Efast um að aðrir flokkar geti pantað slíka þjónustu hjá lögreglunni, nema kannski Framsókn.

Skilgreining á aumingjum:  Engeyingar sem hagnast á öllu saman meðan ríkið borgar brúsann.  Týpískt!

Nóvember nálgast og í lok þess mánaðar á nefnd um leiðréttingu á lánum heimilanna að skila sínum tillögum til forsætisráðherra sem er týndur á einhverri fjarlægri sólarströnd.

Á meðan mælir fjármálaráðherra það sem okkur flest grunar:  Það eru engar leiðir greiðar til að leiðrétta húsnæðislánin.  Öll loforð Framsóknarflokksins um slíkt voru gefin upp á von um atkvæði. Nú þegar þau eru komin í hús má fresta leiðréttingunum út kjörtímabilið og lofa þeim svo aftur fyrir næstu kosningar.

Vonandi grípur þjóðin til búsáhalda í upphafi nýs árs og baular þessa ríkisstjórn sérhagsmuna útgerðar, landbúnaðar og fjármagnseigenda út í hafsauga.  Við megum ekki við þremur og hálfu ári til viðbótar af svona rugli.

Að fjórðungur skuli hafa kosið Framsókn er rannsóknarefni fyrir virta háskóla út í heimi.

Mikið leiðast mér þessar fréttir af íslenskum eiturlyfjasmyglurum sem eru böstaðir hér og þar um heiminn.  Vorkunnartóninn í blaðamönnunum sem rita fréttina. Bara af því að smyglarinn kemur frá Íslandi.

Skil reyndar ekki af hverju er verið að loka eiturlyfjasmyglara inni.  Bara kostnaður fyrir samfélagið.  Er ekki nóg að merkja þá í vegabréfskerfinu eða kyrrsetja þá um tíma?  Hvaða árátta er þetta að loka fólk sífellt inni fyrir smá skattalagabrot eins og smygl?

Stríðið gegn eiturlyfjum er fyrir löngu tapað.  Fáranlegt að eyða fleiri mannslífum og fé í þá botnlausu hít.  Lærum af bannárunum í Bandaríkjunum þegar mafían makaði krókinn á áfengisbanninu.

Lögleiðum draslið og leyfum fólki að drepa sig án afskipta yfirvalda.  Erum allt of mörg hvort sem er á hnettinum.  Fínt að grisja eiturfíklana frá.