Sigmundur Davíð Gunnlaugsson formaður Framsóknar má eiga að hann fer ekki leynt með ástæðu þess að hann ætlar að bjóða sig fram í Norðausturkjördæmi.  Að þar séu spennandi tímar framundan með opnun norðurleiðarinnar í siglingum og olíuleit.

Eins og faðir sinn forðum með Kögun ætlar sonurinn að sölsa undir sig þau tækifæri sem Austfirðingum mögulega bjóðast með umskipunarhöfn og þjónustu við olíuleitendur. Ætlar að taka Halldór Ásgrímsson á þetta, en hann smíðaði kvótakerfið fyrir fjölskylduútgerðina sína á Höfn.

Spurning hvort að Sigmundur sé genginn Huang Nubo á hönd og ætli sér að verða kínverskur kvislingur austur á Grímsstöðum.  Sennilega best fyrir Framsókn að losa sig sem fyrst við þennan pabbastrák og kjósa Höskuld sem formann.

Netið er lifandi miðill sem póstar athugasemdum fólks samstundis í kringum hnöttinn. Við Íslendingar ætlum seint að kveikja á þessari staðreynd. Athugasemdakerfi dv.is er gott dæmi.  Fúkyrðaflaumurinn og hatrið sem þar birtist dag hvern gæti knúið áfram orkuver.

Sjálfur er ég engin undantekning.  Hef drullað svoleiðis upp á bak mér með vanhugsuðum athugasemdum um menn og málefni.  Eyði þeim vanalega daginn eftir núorðið.  Eða einfaldlega tel upp að tíu og sleppi því að leggja orð í belg.  Oft má satt kyrrt liggja.

Netið logar vegna verkstjóra sem var að perrast í unglingsstúlkum í Árborg. Fimm ár skilja hann að tvítugan og stelpurnar fimmtán ára.  Glæpur hans fólst í að segja digurbarkalegar rekkjusögur af sjálfum sér og vinum sínum eftir hverja helgi.

Auðvitað átti hann að halda kjafti. Viðbrögð bæjarfélagsins eru hinsvegar sorglegri.  Fóru í vörn og sökuðu stelpurnar um leti og óhlýðni.  Þess vegna hefði hann dónast í þeim.  Þvílíkir andskotans fávitar!

Man eftir fýr sem sagði okkur strákunum í unglingavinnunni sögur í kaffitímum.  Okkur gaurunum fannst þetta bara fyndið þá.  Er nokkuð viss um að hann hafi hallast í báðar áttir og fengið út úr því að klæmast við táningspilta.  Kynferðisleg áreitni varð ekki til fyrr en löngu seinna.

Eins man ég eftir verkstjóra um tvítugt sem átti í erfiðleikum vegna ásóknar stúlkna í flokknum hans.  Þær létu hann ekki í friði með daðri og áreynslum. Á þessum tíma hefði hann bara verið hleginn út af skrifstofu yfirboðara síns, hefði hann kvartað undan stelpunum.

Dónaskapur brýst fram í ýmsum myndum.