Fávís maður eins og ég skilur ekki af hverju allt mun fara til helvítis ef Ólafur forseti fær ekki að hanga í embætti í tvö ár í viðbót.  Skil ekki heldur hvers vegna náunginn hætti við að hætta.  Enginn er ómissandi.

Nú er ljóst að Icesave fer fyrir EFTA dómstólinn.  Enginn forseti getur sent þau leiðindi aftur til þjóðarinnar.  Við höfnuðum því og tókum áhættu sem er að skila sér í fjöldamálsókn Evrópuríkja gegn okkur.  Blöffið okkar tókst ekki og nú fáum við sko að borga brúsann og það duglega.

Hvað Evrópusambandið varðar þá stendur svart á hvítu að þjóðaratkvæðagreiðsla muni fara fram um samninginn sem okkur býðst.  Þurfum engan Ólaf Ragnar til að baktryggja það.  Og ef illa fer þá gerum við bara allt vitlaust með búsáhöldum.

Auk þess eru góðar líkur á að viðræðum verði bráðlega slitið eða slegið á frest vegna gremju Vinstri-Grænna með þátttöku ESB í málsókn EFTA gegn okkur.  Góðar líkur eru á að hrútleiðinleg kommastjórnin springi loks í loft upp.

Var við það að fríka út í Bónus í gær.  Móðir með ofurofvirkan dreng í eftirdragi var á undan mér.  Get svarið það.  Drengurinn var sem andsetinn.  Ég íhugaði á tímabili að hringja í særingarmann.

Hafði svo vit á því að fara í gagnstæða átt.  Greyið mamman!  Vantaði bara að drengurinn sveiflaði sér veggja á milli.  Sá aðra karlmenn svitna við að líta drenginn augum.  Dáist að þolinmæði kvenna.

Hef aldrei verið neinn snillingur í skák en skilst að meiri möguleiki á sigri fáist með því að hugsa sem flesta leiki fram í tímann og sjá fyrir viðbrögð andstæðingsins.  Eru snillingarnir í ESB ekki einmitt að gera það?

Taka þátt í málsókn gegn okkur sem verður svo látin dæmast okkur í hag til að sýna fram á hve sanngjarnt Evrópusamstarfið getur orðið fyrir Ísland ef við samþykkjum inngöngu.

Eða þá að málsóknin verður látin hanga yfir okkur þar til við samþykkjum inngöngu.  Stjórnin neydd til að sneiða framhjá þjóðaratkvæðagreiðslu.  Annars kemur aldrei til slíks.  Hrunflokkarnir verða teknir við áður en umræðum lýkur.

Helbláir andstæðingar Þóru forsetaframbjóðenda þurfa ekki að hafa neinar áhyggjur af því hvort hún muni vísa Icesave til þjóðarinnar.  Málið er fyrir EFTA dómstólnum og fer aldrei aftur fyrir Alþingi.

Og við neyðumst til að hlýta dómsniðurstöðu.  Hver sem hún verður.  Undir það gengumst við sem höfnuðum Icesave síðast.