Enn einn dómurinn fellur í Hæstarétti og um leið eru fulltrúar bankanna og stjórnmálamenn þeim hliðhollir farnir að túlka hann þeim í vil.  Aðeins þeir sem hafa staðið í skilum og eiga kvittanir því til stuðnings fá vaxtaleiðréttingu samkvæmt skilningi Skattgríms Joð.

Mér finnst rosalega skrítið að Hæstaréttardómar skuli vera túlkaðir jafn frjálslega og textar Biblíunnar.  Bankarnir virðast geta lesið hvað sem er út úr þeim og svo ullað á lántakendur.  Og pólítíkusarnir kvitta upp á.

Æ, hvað heitir aftur hún / hann?  Stundum sé ég eftir að hafa ekki krotað nöfn skóla- og vinnufélaga niður í bók og geymt.  Er svo gleyminn á nöfn þó ég þekki fólk vanalega í sjón.  Getur orðið virkilega vandræðalegt þegar ég rekst á eitthvað af þessu liði.

Skilst að þessi gleymska hafi eitthvað að gera með svæfingar þær sem að ég gekkst undir í æsku.  Las að sérhver svæfing svipti viðkomandi hluta af getunni til að muna einföldustu hluti eins og nöfn á fólki.  Sú vitneskja hverfi fyrst.

Rakst einmitt á fyrrverandi vinnufélaga nýlega og gat engan veginn munað hvað hann heitir.  Reyndi að sjá það á nafnspjaldinu hans en tókst ekki.  Sá það loks á kvittuninni eftir viðskipti okkar.  Og hrópaði „auðvitað heitir hann það!“.

Mér finnst alltaf jafn fáranlegt þegar sóðastrákar fara að væla yfir mótstöðu kvenna gegn nektardansstöðum.  Eins og það séu einhver sjálfsögð réttindi karla að fá að góna upp í klofið á manseldum konum eða kaupa sig upp á þær.

Játa fúslega að hafa farið inn á slíkar búllur í félagi við aðra en aldrei einn.  Leið alltaf eins og nauðgara.  Hef aldrei vogað mér þangað edrú.  Enda gera þessir staðir út á graða og drukkna karlmenn.

Síðast þegar ég fór var það hjá Geira á Goldfinger fyrir nokkrum árum.  Gullfalleg þeldökk stúlka frá Bretlandi bauð mér allan pakkann á 40 þúsund.  Ég afþakkaði og fékk strax illt auga hjá dyravörðunum.  Samt vissi Geiri ekki af neinu vændi.  Skrítið!

Mín eina afsökun er að ég var einhleypur og ölvaður öll skiptin sem ég slæddist með á þessar sóðabúllur.  Margir aðrir voru í sambandi.  Sumir fengu sér einkadans.  Samt ekki allir.  Sjálfur fékk ég einn slíkan í afmælisgjöf.  Hinn keypti ég sjálfur.  Hún var bara svo falleg.