TikTok böndin frá Eyjum eru öll með tvær hljóðrásir. Barnsfaðir minn og Eyjan kallar á mig. Hið fyrra án beygingar og hið seinna í autotune.

Og allir gaurar í buxunum hans afa; útvíðum og asnalegum.

Hef áhyggjur af því hve takmörkuð unga kynslóðin virðist vera.

Húkkarinn var vanalega í íþróttahúsi ÍBV á fimmtudagskvöldinu. 2.000 kall inn og gott band að spila ásamt upphitun.

Enn ekki lengur. Nú er húkkarinn haldinn í einhverju húsasundi við Strandveg og 5.000 kall inn á svæðið. Blaz Roca skásti bitinn ásamt löngum lista af lúserum.

Come on Þjóðhátíðarnefnd!

Þjóðhátíðarlagið er ömurlegt en reynt að bjarga því með Birgittu án árangurs. Dagskráin er rýr. Einu böndin sem hafa einhverja vigt, Retro Stefson og XXX Rottweiler leika hvort um sig í klukkutíma fyrir miðnætti sitt hvort kvöldið. Pálmi Gunnarsson fær þó hrós fyrir að nenna þessu.

Restin eru tvö gamalmennabönd úr Eyjum á litla sviðinu og playback rapparar á stóra sviðinu sem eru berir að ofan með tattú og autotune grípandi í punginn á sér. Sumir jafnvel mæmandi því þeir geta ekkert sungið.

Græðgin er orðin svo yfirgengileg að það er ekki einu sinni lagt í almennileg atriði sem krefjast flutnings með hljómsveit og söngvurum/söngkonum.

Jafnvel FM95Blö ætlar að vera fyrir norðan á Einni með öllu með allt sitt fylgdarlið. Sennilega til að forðast bratta launalækkun frá Þjóðhátíðarnefnd.

Gömlu dagana færðu mér þegar Sálin, SSSól, Nýdönsk, Stuðmenn, Todmobile, Sóldögg og fleiri tóku að sér nótt fram undir morgun eftir kvöldvöku, brennu, flugeldasýningu og blysin í brekkunni. Ekkert gefið eftir og farið að birta þegar maður loksins skreið inn í tjald örþreyttur og ánægður.

Nú snýst hinsvegar allt um að ná inn sem flestum krónum í kassa ÍBV. Þjóðhátíðin í Eyjum hefur breyst í kú sem má endalaust mjólka. Varla líður að löngu uns að bannað verður að fara með mat og drykk inn í Herjólfsdal. Þarft að kaupa allt þar á uppsprengdu verði.