Heppni mín felst í því að blóðbíllinn kom í Marel.  Mig langaði að gefa blóð en fékk það ekki vegna of hás blóðþrýstings.  Var bent á að fara í tékk hjá lækninum mínum.  Þar kom í ljós að ég þjáðist af of háum blóðþrýstingi og var kominn með áunna sykursýki.

Hefði sennilega aldrei komist að þessu nema fyrir tilviljun. Og er ævinlega þakklátur.  Fékk lyf og leið betur.  En það var ekki nóg.  Ég hlýddi ekki nógu vel kallinu um að grennast.  Nú er það breytt.  Þoli ekki lengur aukakílóin. Þau skulu hverfa!

Svo margt fólk trassar að fara til læknis að tékka á stöðunni.  Fær svo kannski heilablóðfall. Eitthvað sem má koma í veg fyrir með því að ná tökum á þrýstingnum í tíma.

Skammirnar (ráðleggingarnar) sem ég hef hlustað á í gegnum árin hafa haldið í mér lífinu.  Síðastliðið ár fór ég þó yfir mörkin og var sendur í skammarkrókinn upp á göngudeild sykursjúkra á Borgarspítalanum.  Var á góðri leið með að fá insúlínpenna og lenda á biðlista fyrir hjáveituaðgerð.  Ég hélt nú ekki!

Náði að snúa þeim hryllingi við.  Nú er stefnan bara niður þyngdarskalann. Ætla aldrei aftur að þyngjast.  Allt annað er eigingirni og uppgjöf.  Sykur er eitur og á ekki að vera nein fórn þó hann hverfi úr mataræðinu.

Hvað ef sömu vopnalög giltu hérlendis og í Bandaríkjum Norður-Ameríku? Guð minn góður segi ég nú bara.  Við gerum grín að Könunum en föttum um leið ekki hve stuttur þráðurinn er í mörgum okkar.  Myndi að minnsta kosti falla einn á dag fyrir byssuskoti.

Prófaðu bara að ganga út í búð og fylgstu með umferðinni.  Mætti halda að bavíanar væru undir stýri.  Þorrinn ekur eins og fábjánar.  Palli einn í heiminum og öll hin eru fyrir mér.  Tefja mig.  Farðu frá, Húsa liggur á!

Finnst stundum eins og breyttu jepparnir sem bruna frekjulega eftir strætum borgarinnar óski sér að vera með fallbyssu upp úr þakinu til að ryðja smábílum úr vegi.  Og alltaf skulu þeir leggja upp á eyjum milli stæða við Bónus.  Bara af því þeir geta það.

Ímyndaðu þér bara ef svona hálfvitar mættu ganga með skammbyssur sér til varnar.  Við yrðum plöffuð niður fyrir minnstu yfirsjónir.  Fyrir að fara í taugarnar á þeim.  Veit að ég yrði skotinn á ferð út um jeppagluggann þar sem ég silaðist fótgangandi meðfram veginum.

Já, við erum jafn vitlaus og lýðurinn vestan meginn við okkur.  Þau ætla að kjósa aftur yfir sig hrunverjana og við ætlum að gera slíkt hið sama.  Í báðum löndum ríkir almennt blackout.  Enginn man hvers vegna löndin okkar eru við það að fara á hausinn.

Vorkenni lögreglu og leigurum í nótt. Siggi Hlö með haustball sitt í Vodafonehöll Vals. Sálin á Spot í Kópavogi. Rokkjötnar í Kaplakrika. This night will be legend…ary!  Og svo öll eftirpartýin.  Ja, hérna, hér!

Ef til vill of mikið í boði.  Kannski nennir fólk hvergi og hangir bara fullt og vitlaust heima hjá sér nágrönnum sínum til ama og andvöku.  Bíður gestum í heimsókn sem dregst fram eftir nóttu með síauknum hávaðastuðli og slagsmálum í lokin.

Ég kenni okri og ofursköttum á áfengi um. Skemmtanalífið myndi siðmenntast töluvert ef brjóstbirtan kostaði ekki svona mikið í einokunarbúðum ríkissins.  Skammarlegt af stjórnvöldum að níðast svona á okkur eyjaskeggjum sem getum ekki skroppið yfir landamæri í ódýrari vörur eins aðrir Evrópubúar.