Hlýtt loft blés framan í borgarbúa í gær og blíðan heldur víst áfram næstu daga. Snilld. Syndaflóðið dagana á undan var nefnilega ekki spennandi en þarft því gróðurinn hefur þvílíkt tekið við sér.

Heldur seint því að rétt mánuður er eftir af sumrinu ef við erum heppin. Útilegunum fer fækkandi eftir allt fiskátið á Dalvík síðustu helgi. Þangað brunar liðið með skuldahalana í eftirdragi til að fá gefins fiskmeti í ginið á sér.

Að lokinni dagsskrá fyllast svo fangageymslurnar af ölkærum heimilisfeðrum sem eiga erfitt með að fara sofa og slysast til að dangla í næsta mann fyrir að sussa á sig. Menningarnótt er framundan. Þá ýta sömu menn sauðdrukknir áfram barnakerrum.

Nú hef ég þraukað í þrjú ár án vinnu.  Minni menn væru löngu búnir að taka eigið líf.  Sem betur fer er ég ekki þannig gerður að sjálfsmorð komi til greina.  Slíkt er nefnilega eigingirni og aumingjaskapur sem leysir engan vanda.  Hef reyndar aldrei íhugað slíkt.

Bjóst ekki við að verða svona lengi án vinnu.  Langar stundum til að klára B.A. gráðuna en get það ekki því ég fæ aldrei námslán í gegnum bankakerfið vegna þess að smáfiskar eins og ég erum steiktir á teini svo megi afskrifa hjá stórlöxunum sem settu landið á hausinn.

Eina sjáanlega leiðin út úr ógöngunum er að lýsa mig gjaldþrota.  Og það fyrir einhverja smáaura.  Kemst ekkert frekar í nám þannig en kannski fyrr en núna.  Er orðinn langþreyttur á að fara niður á skeljarnar til að biðja mér vægðar frammi fyrir gráðugum bankayfirvöldum sem skeyta engu.

Ég er fastur í öngstræti.  Kemst hvorki aftur á bak né áfram.  Og hrunið var ekki einu sinni mér að kenna!

Neðst á síðu 7 í smáauglýsingum Fréttablaðsins í gær birtist eftirfarandi texti á rússnesku:

„Ef kristið fólk þegir þá talar Biblían…

Villist ekki! Hvorki munu saurlífismenn né skurðgoðadýrkendur, hórkarlar né
kynvillingar, þjófar né ásælnir, drykkjumenn, lastmálir né ræningjar Guðs ríki erfa.“

Á biblian.is hljóðar textinn svona.  Sennilega munurinn á gömlu og nýju þýðingunni:

„⁹Villist ekki! Enginn sem er saurlífur, dýrkar falsguði eða lifir í hórdómi, enginn karlmaður sem lætur nota sig eða notar aðra til ólifnaðar, ¹⁰enginn þjófur eða fégráðugur, vínsvallari, rógberi eða fjársvikari fær að erfa Guðs ríki.“

Tók sjálfur ekki eftir þessu fyrr en þras tók að birtast á netinu.  Fletti svo upp í hinni helgu bók á netinu til að staðfesta nöldrið.  Bý nefnilega ekki sjálfur svo vel að eiga þá rykföllnu skruddu sitjandi á bókahillunni.

Klerkur rússneska safnaðarins vill engu svara.  Gildir einu.  Þvílíkur dónaskapur að birta slíkan texta á sjálfan gleðigöngudaginn.  Samt ekki við Fréttablaðið að sakast.  Textinn er á rússnesku en með tilvísun í Fyrra Korintubréf.  Ekki allir sem fatta að fletta því upp.

Ekki nóg með að þessir rússnesku réttrúnaðarklerkar séu að níðast á pönksveitinni Pussy Riot í sínu heimalandi, heldur vilja þeir fara að kúga okkur Íslendinga til hlýðni.  Hunskastu heim pokaprestur.  Hefur ekkert hingað að gera. Farðu og sleiktu rassgatið á Pútín!